भांगरभूंय | प्रतिनिधी
म्हापशें: पुलिसांनी ड्रग्स विरोधी कारवाये खाला दुबावीत शमशू खान (26, रा. इंदिरानगर, चिंबल) हाका अटक केल्या आनी ताचे कडल्यान 80 हजारांचो 800 ग्राम गांजो जप्त केला.
शुक्रारा सकाळीं म्हापशेंच्या नव्या बस स्टॅण्डा फाटल्यान ड्रग्साचो विक्री वेव्हार जावपाचो आसा अशी म्हायती पुलिसांक खाशेल्या गोपां कडल्यान मेळिल्ली. ते प्रमाण पुलीस पंगडान सांपळो रचलो. दुबावीत आरोपी ड्रग्स घेवन येतकूच ताका पुलिसांनी धरलो.
झडटे वेळार दुबाविता कडेन 800 ग्राम गांजो सांपडलो. पुलिसांनी हो गांजो जप्त केला आनी घुंवळे वखदां प्रतिबंधक कायद्या खाला गुन्यांव नोंद करून दुबावीत शमशू खान हाका अटक केली.
पुलीस निरिक्षक सोमनाथ माजीक हांच्या मार्गदर्शना खाला उपनिरिक्षक रिचा भोंसले, हवालदार सुशांत चोपडेंकार, कॉन्स्टेबल प्रकाश पोळेकार, विनय हिरोजी, अक्षय पाटील, राजेश कांदोळकार, तुकाराम कांबळी आनी आनंद राठोड ह्या पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
