भांगरभूंय | प्रतिनिधी
50 हजारांच्यो वस्तू फारायल्यो
म्हापशें: अन्साभाट, विठ्ठलवाडी म्हापशेंच्या श्रीविठ्ठल रखुमाय देवळांत चोरी जाली. रुप्याचें शिवलींग आनी हेर मेळून 50 हजारांच्यो वस्तू फारायल्यो.
ही घडणूक शुक्रारा सकाळीं उक्तडार आयली. दुबावीत अनवळखी चोरांनी देवळाच्या गाभार्यांतले रुप्याचें ल्हान आकाराचें शिवलींग, पुरयताचो मोबायल फोन आनी एक पॅन ड्रायव्ह अश्यो वस्तू चोरून व्हेल्यो.
पुलिसां कडल्यान मेळिल्ले म्हायती प्रमाण पुरयत सुनील नायक हे शुक्रारा सकाळीं देवळाच्या गाभार्यांत पुजा करपा खातीर आयले तेन्ना हो चोरयेचो प्रकार उक्तडार आयलो. ह्या पुरयताचो मोबायल फोन देवळांतल्यान बिरेस्तारा सांजवेळा चोरयेक गेल्लो. तांणी ह्या प्रकरणांत त्याच दिसा पुलिशेंत कागाळ दिल्ली.
पूण शिवलींग चोरयेक गेलां हें तेन्ना लक्षांत येवंक नाशिल्लें. दुबावितान गाभार्यांत अभिषेक करपा खातीर वापरतात तें रुप्याचें शिवलींग चोरलें. ह्या शिवलिंगाचें 30 हजार रुपया मोल आसा. तशेंच एक पॅन ड्रायव्हूय चोरलो.
बिरेस्तारा 27 वेर सांजवेळा एक भक्तान नवीन दुचाकी खरेदी केल्ली. तो देवळांत दुचाकी घेवन पुजे खातीर आयिल्लो. ताका लागून पुरयत देवळा भायर गाडयेची पुजा करपा खातीर गेल्लो. हे संदीचो गैरफायदो घेवन दुबावितान ही चोरी केली. देवळाच्या सीसीटीव्ही कॅमेर्यांत हो प्रकार कैद जाला.
हे घडणुकेचो पंचनामो म्हापशें पुलिसांनी केला. फुडलो तपा सुरू आसा. मजगतीं, फाटल्या 15 वर्साच्या काळांत ह्या देवळांतले चोरयेची तिसरी घडणूक आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
