भांगरभूंय | प्रतिनिधी
मेधा पर्रीकार दुयेंती सेवा केंद्राचो 13 मे दिसा वर्धापनदीस
म्हापशें: मेधा पर्रीकार दुयेंती सेवा केंद्राचो 20 वो वर्धापनदीस सुवाळो शेनवार 13 मे दिसा मनयतले. ह्या वेळार घरगुती निसर्गोपचार पद्दतीन निरोगी जीण कशी जगची ह्या विशयाचेर राष्ट्रीय पुरस्कार जैतिवंत संजिवनी निसर्गोपचार केंद्राचे निसर्गोपचार तज्ञ डॉ. स्वागत तोडकर हे मुखेल उलोवपी म्हूण मार्गदर्शन करतले, अशी म्हायती ह्या केंद्राचे संजय वालावलकार हांणी दिली.
हो सुवाळो म्हापशेंच्या सिरसाट सभाघरांत सांजवेळा 5.30 वरांचेर जातलो. सोमारा आयोजीत केल्ले पत्रकार परिशदेंत वालावलकार उलयताले. ह्या वेळार अमेय नाटेकार, नारायण शिंदे, हर्षद स्वार आनी प्रसाद साळगांवकार हाजीर आशिल्ले.
नारायण शिंदे हांणी म्हणलें, हे कार्यावळीक मुखेल सोयरे म्हूण केंद्रीय पर्यटन राज्यमंत्री श्रीपाद नायक आनी मानाचे सोयरे म्हूण दिव्यांगजन सशक्तीकरण विभागाचे आयुक्त गुरुप्रसाद पावसकार हाजीर रावतले.
संजय वालावलकार हांणी म्हणलें, गरजू आनी गरीब दुयेंतीक विवीध प्रकारचीं वैजकी उपकरणां फुकट उपलब्ध करून ती वापरपाक दिवन दुयेंतींचीं सेवा करपी म्हापशेंच्या सर्गेस्त मेधा पर्रीकार दुयेंती सेवा केंद्र फाटलीं 20 वर्सा सेवा करीत आसा.
बार्देस, तिसवाडी, पेडणें, फोंडें, वास्को वाठारांतल्या दुयेंतींनी आमचे सेवेचो लाव घेतला. दुयेंतींचे मागणे प्रमाण दुयेंतीक उपेगा पडपी साहित्याची पुरवण करतात. कोविडाच्या काळांत लेगीत ह्या केंद्रान ऑक्सिजन सिलिंडरा सयत 24 वरां अॅम्बुलन्सीची सेवा दिल्या. तशेंच वेळावेळार भलायकी तशेंच रक्तदान शिबिरांचें आयोजन करतात. संस्थे कडेन आतां 15 लाखांची वैजकी उपकरणां उपलब्ध आसात अशी म्हायती वालावलकार हांणी दिली.
डॉ. स्वागत बळीराम तोडकर हे देशांतले एक अणभवी आनी सेवाभावी निसर्गोपचार तज्ञ म्हूण वळखीचे आसात. ज्या लोकांक वखदां दिवप शक्य ना, तांकां घराच दुयेंसाचेर उपचार करून भलायकी कशी सांबाळूं येतली हे विशीं ते उपयुक्त मार्गदर्शन करतात. देश-विदेशांत तांणी खूबशीं व्याख्यानां दिल्यांत अशी म्हायती संजय वालावलकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
