भांगरभूंय | प्रतिनिधी
एकल्याक अटक; गुन्यांव फांट्याची कारवाय
म्हापशें: फेअरा आल्त म्हापश्यां पुलिसांच्या गुन्यांव फांट्यान धाड घालून दुबावीत आरोपी अब्दूल समद (31, रा. उडपी, कर्नाटक) हाका अटक केली. ताचे कडल्यान अँफेटामायन ह्या ड्रग्सा सयत पोरण्यो नोटी मेळून 1.35 लाखांचो म्हालवज जप्त केलो. पुलिसांनी ही कारवाय सोमारा सांजवेळा 4.55 ते 7.25 वरां मजगतीं केली.
गुन्यांव फांट्याक म्हापश्यां ड्रग्साचो विक्री वेव्हार जावपाचो आशिल्ल्याची म्हायती मेळिल्ली. ते प्रमाण पुलीस पंगडान सांपळो रचलो.
फेअरा आल्त हांगा सेंट ब्रिटोस अपार्टमेंटा कुशीक दुबावीत आरोपी येतकूच ताका पुलिसांनी धरलो. झडटे वेळार दुबाविता कडेन 15.523 ग्राम वजनाचो अँफेटामायन हो ड्रग्स, पोरण्यो 500 रुपयांच्यो दोन नोटी आनी मोबायल सांपडलो. हो वट्ट 1 लाख 35 हजारांचो म्हालवज आसा.
पुलिसांनी दुबाविता आड घुंवळे वखदां प्रतिबंधक आनी भादंसंच्या कलमा खाला गुन्यांव नोंद करून ताका अटक केली आनी म्हालवज जप्त केलो.
पुलीस निरिक्षक विकास देयकार, उपनिरिक्षक गिरीश पाडलोस्कार, हवालदार अशोक गावडे, इर्शाद वाटंगी, कॉन्स्टेबल महाबळेश्वर सावंत, विनायक सावंत, संजय गांवकार, रुपेश गायकवाड आनी कल्पेश तोरस्कार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
