भांगरभूंय | प्रतिनिधी
अन्न आनी वखदां प्रशासनाची कारवाय
म्हापशें: हांगासरल्या मार्केट सब यार्डांत अन्न आनी वखदां प्रशासनान (एफडीए) कृत्रिम रितीन रसायनान पिकयिल्लीं 800 कील केळी जप्त केल्यांत. ह्या केळींचें मोल 65 हजार रुपया आसा.
बुधवारा सकाळीं प्रशासनान ही कारवाय केली. म्हापशेंच्या सब यार्डांत मोगबोड अहमद हाच्या ठोक केळी विक्री दुकानाचेर धाड घाली. तेन्ना पळोवणी केले उपरांत दुकानांत रासायनीक पद्दतीन पिकयिल्लीं सुमार 800 कील केळी सांपडलीं.
तशेंच केळी पिकोवपा खातीर वापरिल्लें इथाफोन हें रसायनीक द्रव्य लेगीत जप्त केलें. उपरांत म्हापशें पालिका मुख्याधिकाऱ्याचे मजतीन ह्या केळींचो विलो लायलो. तशेंच दुकानांतल्या हेर फळांचे नमुने अन्न प्रयोगशाळेंत धाडून दिल्यात.
मजगतीं, हाचे पयलीं यार्डांत शेख हनीफ हाच्या दुकानांतले केळीचे नमुने घेतिल्ले. तातूंत हीं केळीं कृत्रीम रितीन पिकयिल्ल्याचें दिसून आयिल्लें.
ह्या दोनूय दुकान धनयां आड अन्न सुरक्षा आनी मानक कायद्या खाला गुन्यांव दाखल केला, आनी ह्या कायद्या प्रमाण संबंदितांचेर कारवाय करतले.
प्रशासनाचे उत्तर गोंय अधिकारी रिचर्ड नोरोन्हा, अन्न सुरक्षा अधिकारी राजराम पाटील, माधव कवळेंकार, प्रितम पारम, सोनल गोवेकार आनी कर्मचारी साईनाथ च्यारी ह्या पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
