भांगरभूंय | प्रतिनिधी
म्हापशें: जिणेगरजेच्या वस्तू सयत पॅत्रॉल, डिझॅल, गॅस सिलिंडराचीं मोलां व्हड प्रमाणांत वाडल्यांत. सर्वसामान्यांचें जगप कठीण जालां. हे वाडटे म्हारगायेक काँग्रेसीन दुशण दिवन लोक जागृती उपक्रम राबयला. हाचो शुभारंभ शुक्रारा म्हापशें मार्केटाच्या प्रवेशदारार केलो.
सरकारान ही म्हारगाय ताकतिकेन नियंत्रणांत हाडून लोकांक थाकाय दिवची अशी मागणी करून प्रदेश काँग्रेसीच्या पदाधिकाऱ्यांनी भाजपा सरकाराचो निशेध केला. तशेंच बाजारेठेंत म्हारगाये आड पत्रकां वांटलीं.
ह्या वेळार प्रदेशाध्यक्ष अमीत पाटकार, म्हणयारो संजय बर्डे, युवा अध्यक्ष वरद म्हाड्डोळकार, उत्तर गोंय जिल्हो अध्यक्ष विरेंद्र शिरोडकार, नगरसेवक सुधीर कांदोळकार, गुरूदास नाटेकार, विजय भिके, म्हापशें गट अध्यक्ष अॅड. शशांक नार्वेंकार, सुदीन नायक आनी हेर पदाधिकारी हाजीर आशिल्ले.
प्रदेशाध्यक्ष अमीत पाटकारान म्हणलें, जिणेगरजेच्या वस्तूं पसून इंधनाचें मोल वाडिल्ल्यान सर्वसामान्यांचें भेंड मोडलां. प्रधानमंत्री नरेंद्र मोदी दुसरे वटेन वर्साक 2 कोटी रोजगार दितले अशें आस्वासन दितात. फाटल्या आठ वर्सांत बेरोजगारीची टक्केवारी चार पटींनी वाडल्या. अनियोजीत जीएसटीक लागून 14 कोटी लोकांच्या उदरनिर्वाहाचेर हावळ आयल्या. 20 ते 26 पिराये गटांतले सुमार 42 टक्के तरणाटे बेरोजगार आसात अशी टिका तांणी केली.
म्हारगाय तशेंच बेरोजगारीचो मुद्दो भरकटावपा खातीरूच भाजप सरकार हेतुपुरस्सर फटीचे अजेंडे चलयतात. तातूंतल्यानूच सरकारान सेव्ह सॉयल हो मुद्दो हाडला. हातूंत भाजपा सरकार म्हणटा पडीक जमीन ताब्यांत घेतले. सरकाराच्या ह्या धोरणाक लागुनूच गोंयची खूबशीं शेतां पडीक आसात असो आरोप पाटकार हांणी केलो.
2014 वर्सांतलीं जिणेगरजेच्या वस्तूंची मोलां आनी आतांचीं मोलां हातूंत तुळा करची आनी सर्वसामान्यांक हाची गंभीरताय जावची हे खातीर काँग्रेसीन हो उपक्रम हातांत घेतला अशें पाटकार हांणी म्हणलें.
ह्या वेळार संजय बर्डे, वरद म्हाड्डोळकार, अॅड शशांक नार्वेंकार, सुदिन नायक, सुधीर कांदोळकार, गुरूदास नाटेकार हांणींय उलोवपां करून सरकाराचो निशेध केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
