म्हापशें मुख्याधिकाऱ्याचो पदाचो गैरवापर

भांगरभूंय | प्रतिनिधी

दक्षता खात्यांत प्रभू चेंबर्स युनिटधारकांची कागाळ

म्हापशें: हांगासरलो वादग्रस्त प्रकल्प प्रभू चेंबर्साच्या युनिटधारकांनी म्हापशें पालिकेचे मुख्याधिकारी चंद्रकांत शेटकार हांचे आड दक्षता खात्यांत फटवणूक तशेंच पदाचो गैरवापर करून रद्द केल्लो भोगवटो दाखलो (occupancy certificate) परतून तयार केल्ल्याची कागाळ दाखल केल्या.

युनीट धारकां मदीं जितेश कामत हांणी म्हणलें, मुख्याधिकारी चंद्रकांत शेटकार हांणी कायद्याचें उल्लंघन करून आपल्या पदाचो गैरवापर केल्ल्याचो आरोप तांणी केलो. फटवणूक करून सदर इमारतीचो भोगवटो दाखलो मंजूर करपी मुख्याधिकारी आनी अभियंत्यांक तत्काळ निलंबीत करपाची मागणी तांणी केली.

ह्या वेळार इम्रान सय्यद, अनीस शेख, किशोर भाईडकार, डॉ. हर्षद पेडणेंकार, डॉ. तुषाद काणेकार, ऑस्कर गोम्स, अँथनी मोन्तेरो, अ‍ॅड. शुभदा देसाय, बशीर शेख, राकेश कदम, सूर्यकांत नायक, मुनीर शेख, अनंतकुमार सिंग, अ‍ॅश्ली आरंजो, देवकीनंदन प्रभू, महेश नार्वेंकार, सुरेश पेडणेंकार, महेश शेट्टी, जीजस बार्रेटो, रोझी मास्कारेन्हस, कांचन आजगांवकार, स्नेहांकीत पेटकार आनी हेर मानेस्त हाजीर आशिल्ले.

ह्या भ्रश्ट अधिकाऱ्यांक सेवेंतल्यान बडतर्फ केले ना जाल्यार आमी रस्त्यार देंवतले अशेंय कामत हांणी स्पश्ट केलें. ह्या विशशिश्ट अधिकाऱ्यांक आपूण कायद्याचे वयर आसात अशें दिसता. मुळांत तांचे आड खूबश्यो कागाळी प्रलंबीत आसात. शेकटर हांचेर कथीत भ्रश्टाचारचे आरोप करपाची ही पयलीच वेळ न्हय. अशा अधिकाऱ्या विशीं सरकार सहानुभुती कशी बाळगूंक शकता असो प्रस्न कामत हांणी उपस्थीत केलो.

मजगतीं, 12 सप्टेंबर 2019 दिसा म्हापशें पालिकेन प्रभू चेंबर्साच्या वादग्रस्त इमारतीचो भोगवटो दाखलो रद्द केल्लो. ते प्रमाण युनिटधारकांनी गोंय स्थावर मालमत्ता नियमन प्राधिकरणा कडेन धांव घेतिल्ली तेन्ना वयल्या आदेशा वरवीं थाकाय मागिल्ली. उपरांत, रेरान आदेशाच्या अंमलबजावणी खातीर हें प्रकरण मुखेल जिल्हो न्यायालया कडेन वर्ग केल्लें. ह्या सुनावणे वेळार न्यायालयान म्हापशें पालिकेक 1 सप्टेंबर 2023 दिसा सुवातेची पळोवणी करून पालन अहवाल सादर करपाचे निर्देश दिल्ले. ते प्रमाण पालिकेन मुख्याधिकाऱ्याच्या फुडारपणा खाला घडणूक थळाची पळोवणी केली, आनी 6 सप्टेंबर 2023 दिसा न्यायालयांत पालिकेन सादर केल्ल्या अहवालांत नमूद केलें की मेसर्स प्रभू कन्स्ट्रक्शन्सा कडल्यान कांय उणाव अजून पाळिनात, आनी न्यायालयांत वयलो अहवाल सादर केल्ल्या दुसर्‍याच दिसा मुख्याधिकाऱ्यान स्वताच्या अहवालाच्या विसंगतीक पाळो दिनासतना भोगवटो दाखलो परतून तयार केलो.

ह्या निर्णया आड युनिटधारकांनी पालिका प्रशासनाचे संचालक गुरुदास पिळर्णकार हांचे कडेन धांव घेतली. ते प्रमाण संचालकांनी प्रभू चेंबर्स इमारतीक दिल्लो भोगवटो दाखलो रद्द केलो. तांणी आपल्या आदेशांत म्हणलां की, प्रकल्प थळा वयल्यो त्रुटी पयस करिनासतनाच भोगवटो दाखलो परतून तयार करप हें थंयच्या थळाव्या आनी भौशीक हिता आड आसा.

जनेलांक ग्रिल्स नात, लिफ्ट कार्यरत ना. तशेंच कायमस्वरुपी वीज पुरवण ना आनी उदक भायर काडपा खातीर पंपाचो वापर जायना. हें मुख्याधिकारी आनी पालिका अभियंत्यांनी 1 सप्टेंबर 2023 च्या थळ तपासणीच्या अहवाला वरवीं ह्या विसंगतींचें निरिक्षण केलां. अशा वेळार इमारतीचो भोगवटो दाखलो परतून तयार करप हें पळोवणी तपासणी अहवालाचे आड आसा असो शेरो पालिका प्रशासन संचालकांनी आदेशांत मारिल्ल्याचें कामत हांणी सांगलें.