भांगरभूंय | प्रतिनिधी
म्हापशें, प्रतिनिधी ः घाटेश्वरनगर, खोर्ली म्हापशेंचे एके भाड्याचे कुडीक उजो लागून सुमार ५० हजारांचें लुकसाण जालें. थळाव्यांचे मजतीन उजो पालोवपी दळाच्या जवानांनी उज्याचेर नियंत्रण मेळयलें. ताका लागून व्हड घडणूक जावपा पासून वाटवलें.
ही घटना बिरेस्तारा सकाळीं ११.१५ च्या सुमाराक घडली. अनिल केरकार हांच्या घरांतले भाड्याचे कुडींत सार्थक पाटील हांचें कुटूंब भाड्याक रावता. सकाळीं ते ही कूड बंद करून कामाक गेल्ले. ताचे फाटल्यान ही घडणूक घडली. ती केरकार कुटूंब आनी शेजार्यांक कळ्ळें. हे घडणुके सुवातेर एक कामगार काम करतालो. तांणी कोयतो घेवन दाराचें कुलूप तोडलें. उपरांत थळाव्यांनी उजो पालोवपाचो यत्न केलो.
मजगतीं, म्हापशें उजो पालोवपी दळाचे जवान दाखल जाले. तांणी उदक मारून उजो पालयलो. हे कुडींत टिव्ही, हेर सामान आनी पांख्याच्या उज्याक लागून बरेंच लुकसाण जालें. हातूंत सुमार ५० हजारांचे लुकसाण जालें.
मजगतीं, पाटील कुटूंबियांनी कुडींत दिवो पेटोवन दवरिल्लो. ताका लागून वा शॉर्ट सर्कीट जाल्ल्यान उजो लागिल्ल्याची शक्यताय उजो पालोवपी दळान उक्तायल्या. उजो पालोवपी दळाचे हवालदार प्रकाश कान्नायक, साईराज नायक, लविंदर साळगांवकार, प्रवीण गांवकार, सखाराम गांवकार आनी साईल गांवस ह्या जवानांनी उजो पालयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
