भांगरभूंय | प्रतिनिधी
वाळपय, उदय सावंत : फाटल्या अडेज वर्सांच्या म्हज्या काळांत वाळपय नगरपालिका वाठारांत जायतीं उदरगतीचीं कामां जाल्यांत. भलायकी मंत्री विश्वजीत राणे हांच्या सहकार्याक लागूनच हीं कामां शक्य जालीं. सहकारी म्हामंडळांनी बरें सहकार्य दिलां. देखून वाळपय नगराध्यक्षपदाचो राजिनामो दिवन वाळपयच्या लोकांक समाधानकारक सेवा दिवपाक आपूण येसस्वी जाल्यां, अशी प्रतिक्रिया सेहझीन शेख हांणी उक्तायल्या. आपणें केल्ल्या कामांचो ताणें नियाळ घेतलो. सगळ्यांच्या संघटनात्मक यत्नांक लागून तें शक्य जालां अशें तांणी स्पश्ट केलें.
नगराध्यक्ष पद बायलां खातीर राखून दवरिल्ल्यान विश्वजीत राणे हांचे सुचोवणे प्रमाण सेहझीन हांची ह्या पदार निवड जाली. ही नेमणूक अडेज वर्सां खातीर आशिल्ली. मुजत पुराय जातकच तांणी पदाचो राजिनामो दिलो. आतां नवो नगराध्यक्ष वेंचून येतलो. पदाचो राजिनामो दिले उपरांत सेहझीन शेख हांचे कडेन ह्या प्रतिनिधीन संवाद सादलो.
नगरपालिका मैदानाचें काम पुराय
फाटल्या कितल्याशाच वर्सां सावन वाळपय पालिकेचें मैदान सारके करून दिवपाची मागणी लोक करीत आशिल्ले. गोंय मुक्ती दिसा निमतान गोंय सरकारान भांगरा महोत्सव निधी पालिकेक उपलब्ध करून दिल्लो. तो ह्या मैदानाचेर वापरलो आनी सुमार एक कोटी खर्च करून मैदानाक नवें रूप दिलें. ह्या मैदाना संबंदी जायते प्रस्न फुडें आयिल्ले. आतां खेळगडे ह्या मैदानाचो बरे तरेन उपेग करतात. पालिकेंतल्या दरेका नगरसेवकांनी बरें सहकार्य केल्ल्यान ह्या प्रकल्पाची उदरगत करप शक्य जालें. तशेंच वाळपय वाठारांत बर्यो सुविधा निर्माण जाल्यात अशें सेहझीन शेख हांणी सांगलें.
नाणूस मैदानांचेर खेळां सुविधा मेळटल्यो
विश्वजीत राणे फाटल्या कांय वर्सां सावन वाळपय वाठारांत सुमार ६० कोटी खर्च करून बरी खेळां सुविधा दिवपाचो यत्न करतात. सध्या आधुनीक खेळां सुविधा दिवपाचें काम नेटान चलता. हे विशीं बुन्याद कांय म्हयन्यां पयलीं घाल्ली. हांगा झुजा पांवड्यार काम चालू आसा आनी फुडल्या काळांत वाळपय आनी सत्तरी म्हालांतल्या खेळगड्यांक आनी नागरिकांक ह्यो सुविधायो मेळटल्यो. हो प्रकल्प सुरू करपाचे नदरेन मंत्री विश्वजीत हांच्या यत्नांक पालिकेन आदार दिलो. हे विशीं तांणी सांगलें, आपूण नगराध्यक्ष आशिल्ल्यान हो भोवमान आपल्याक फावो जालो हें आपलें नशीब. फुडाराक हो प्रकल्प नागरिकां खातीर खूब म्हत्वाचो थारतलो अशें सेहझीन शेख हांणी सांगलें.
मासोड्ड्यां फुटसाल मैदानाची सुविधा
सत्तरीच्या दरेका पंचायत पांवड्यार वाळपय पालिका वाठारा वांगडाच फुटबॉल मैदानाची सुविधा दितले अशें विश्वजीत राणे हांणी जाहीर केलां. तांची संकल्पना वाळपय वाठारांतल्यान सुरू जाल्या. वाळपय नगरपालिका वाठाराचो एक भाग आशिल्ल्या मासोर्डे हांगा फुटसाल मैदानाची सुविधा एका वर्सान पुराय जाली. हालींच उक्तावण जालें. सध्या वाळपय फुटबॉलाचें पिशें वाडलां, पूण ताचे खातीर गरजेच्यो सुविधा दिवप तितलेंच म्हत्वाचें. मासोर्डे फकत एका वर्सांत ही सुविधा तयार करपा खातीर पालिके कडल्यान बरे यत्न जाल्यात अशें तांणी सांगलें.
वाळपय नगरपालिका वाठारांतल्या नागरिकांक कसलेच तरेचे त्रास जावचे नात, हाचेर खासा लक्ष दिलां. सध्या घराघरांतलो कोयर उखलपाचें काम नेटान चालू आसा. हे खातीर नागरीक सहकार्य करतात. फुडाराक नागरिकांनी पालिकेक सहकार्य दिवचें अशी मागणी सेहझीन शेख हांणी उक्तायल्या. फुडल्या अडेज वर्सां खातीर पालिकेचे एकंदर उदरगती खातीर गरज पडल्यार हांव नक्की सहकार्य करतलें अशें सेहझीन हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
