भांगरभूंय | प्रतिनिधी
कोरगांव, प्रतिनिधी ः गोंय भोंवडेर आयिल्ले दोन पर्यटक फैज अहमद (47, पुणे) आनी राजेश शर्मा (50, बेंगळुरू) हे आयज सकाळीं मोरजे दर्यांत बुडले.
फैज अहमद तीन दीस आदीं घरकान्न फातिमा आनी दोन भुरग्यां सयत गोंय भोंवडेर आयिल्लो. हें कुटुंब मोरजी दर्यांदेगेर आशिल्ल्या रिसॉर्टांत रावतालें. आयज सकाळीं साडे आठ वरांचेर तो दर्यांत बुडलो. हें पळोवन लायफगार्ड मजतीक धावले आनी ताका भायर काडलो. उपरांत ताका शिवोली भलायकी केंद्रांत उपचारा खातीर दाखल केलो. मुखार पेडणेंच्या भलायकी केंद्रांत व्हेलो. थंयच्या दोतोरांनी ताका मरण आयिल्ल्याचें सांगलें.
दुसरे घडणुकेंत, बेंगळुरूचो राजेश शर्मा दोन दीस आदीं इश्टां सयत गोंयांत आयिल्लो. आज सकाळीं तो इश्टां सांगाता मोरजीच्या दर्यांत न्हावपाक गेलो. राजेश उदकांत बुडलो तेन्ना लायफगार्डांनी रोखडोच ताका भायर काडलो आनी पेडणेंच्या भलायकी केंद्रांत दाखल केलो. पूण तो मेरेन ताका मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
