भांगरभूंय | प्रतिनिधी
वास्को: नव्या उमेदवारांनी कांय पोरणें सरपंच, उपसरपंच, पंच हांचे मुखार आव्हान उबें केल्ल्याचें दिसून येता. ह्या वेळार बायलां उमेदवार अदीक आशिल्ल्यान कांय पंचायतींनी ‘महिलाराज’ येवपाची शक्यताय आसा. मतदानाचो नियाळ घेवन कांय उमेदवारांनी आपलेंच जैत निश्चीत आशिल्ल्याचें जाहीर केलां.
सांकवाळच्या प्रभाग दोनांतल्यान उबे राविल्ले आरटीआय कार्यकर्ते नारायण नायक आनी प्रभाग तिनांतल्यान उबे राविल्ले तांचो भाव आनी दक्षीण गोंय भाजपाचे अध्यक्ष तुळशीदास नायक हांचे कडेन मतदारांचें लक्ष लागलां. दोगांय भावांनी आपआपल्या प्रभागांतल्यान जैताची खात्री आशिल्ल्याचें सांगलां.
फाटले पंचायत वेंचणुकेंत नारायण नायक हांची घरकान्न फक्त एका मतान हारिल्ली. नारायण नायक हांचेर देड वर्सां पयलीं सांकवाळ पंचायती मुखार जिवघेणो हल्लो केल्लो. तांचेर हल्लो करपा फाटल्यान कोणाचो हात आसा हे संबंदी खूबशी चर्चा रंगिल्ली. तांणी सांकवाळ पचायतींतले कांय घोटाळे आनी भ्रश्टाचार उक्ताडार हाडिल्ल्यान तांचेर हल्लो जाल्लो अश्यो प्रतिक्रिया उक्तायिल्ल्यो.
चिखलेंतल्यान अस्तंते उपसरपंच कमलाप्रसाद यादव आनी तांची घरकान्न सुनीतादेवी यादव वेंचणूक रिंगणांत आसात. चिखलेचे अस्तंते सरपंच सेबी परेरा हांणी प्रभाग णवांतल्यान आपले घरकान्नीक वेंचणूक रिंगणांत देंवयल्यात. तांकां जैताची व्हड संद आशिल्ल्याचें सेबी परेरा हांणी सांगलें.
सांकवाळचे आदले सरपंच रमाकांत बोरकार, गिरीश पिल्ले हांणी आपले जैत निश्चीत आशिल्ल्याचें सांगलें. कुठ्ठाळी पंचायतींत आदले सरपंच सेनिया परेरा आनी आदले उपसरपंच रेमंड डिसा हांचे लडटी कडेन सगल्यांतची नदर लागल्या. एकामेकांचेर आरोप-प्रत्यारोप केल्ल्यान सेनिया परेरा आनी रेमंड डिसा उजवाडांत आयल्यांत. रस्ते, उदक, वीज तशेंच थळावे प्रस्न घेवन कांय जाण वेंचणुकेंत उबे रावल्यात.
मुरगांव म्हालांतल्या चिखली, चिकोळणें, सांकवाळ, वेळसांव-पाळें, कुठ्ठाळी, केळशी, कांसावली ह्या सात पंचायतीं मदीं वट्ट 72.39 टक्के मतदान जालां. वट्ट 63 प्रभागां खातीर 220 उमेदवार उबे आसात. तातूंत कुठ्ठाळीच्या प्रभाग चारांतलो उमेदवार बिनविरोध वेंचून आयला. ह्या सातूय पंचायतीं मदीं वट्ट 41 हजार 383 मतदार आशिल्ले. तातूंतल्यान 29 हजार 939 मतदारांनी मतदान केलें. सगल्यांत उणें मतदार चिकोळणें पंचायतींत जाल्यार सगल्यांत चड मतदार सांकवाळ पंचायतींत आशिल्ले. चिकोळणेंच्या सात प्रभागां खातीर 1769 मतदारां मदीं 1382 मतदारांनी मतदान केलें. वेळसांव पाळेच्या सात प्रभागां मदीं 3180 मदल्या 2132 मतदारांनी मतदान केलें. सांकवाळच्या वट्ट 15,507 मतदारां मदल्या 11,800 जाणांनी मतदान केलें. कुठ्ठाळीच्या वट्ट इकरा प्रभागांत 4, 859 मतदार आशिल्ले. तातूंतल्या 3,522 मतदारांनी मतदान केलें.
कांसावलेच्या णव प्रभागांनी 4,726 मतदारां मदल्या 3,119 मतदारांनी मतदान केलें. चिखलेच्या इकरा प्रभागांनी 9,195 मतदारां मदल्या 6,334 जाणांनी मतदान केलें. केळशीच्या वट्ट 2147 मतदारां मदीं 1650 मतदारांनी मतदान केलं.
चडांत चड मतदारांनी मतदान करचें हे खातीर उमेदवारांची धांवपळ चलिल्ली. आपल्य प्रभागा बदला दुसरी कडेन रावपाक गेल्ल्यां कडेन संपर्क सादून तांकां मतदानाच्या दिसा मतदान केंद्राचेर हाडपाचो यत्न कांय उमेदवारांनी केले. कांय मतदार देशा भायर रावत आशिल्ल्यान ते मतदान करूंक शकूंक नाशिल्ल्यान कांय उमेदवरांच्या मतांचेर परिणाम जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
