भांगरभूंय | प्रतिनिधी
कांय सुवातींनी किरकोळ वाद; मंत्री मॉवीन गुदिन्हो हांचे पयलेच फावटी पंचायती खातीर मतदान
वास्को: मुरगांव म्हालांतल्या चिखली, चिकोळणा, बोगमाळो, सांकवाळ कुठ्ठाळी, केळशी, कांसावली, पाळें वेळसांव ह्या सांत पंचायती खातीर कांय किरकोळ वाद सोडल्यार शांततायेन मतदान जालें. सकाळीं बोगमाळो सोडून हेर सुवातींनी मतदानाची गती उणी आशिल्ली. पूण दनपारा उपरांत सगल्या पंचायतींनी मतदार मतदाना खातीर भायर सरिल्ल्यान मतदानाची गती वाडली.
पंचायत मंत्री मॉवीन गुदिन्हो आनी तांच्या चल्यान आपलो मतदानाचो हक्क बजायलो. गुदिन्हो हांणी पयलेच फावटी ग्रामपंचायत वेंचणुकेंत मतदान केल्ल्याचें सांगलें. मांगोरहील वाठारांत आपलें घर आशिल्ल्यान पंचायत वेंचणुके खातीर आपणाक मतदान करूंक मेळनाशिल्लें. पूण फाटले विधानसभा वेंचणुकेंत आपूण दाबोळी मतदारसंघांत रावपाक आयिल्ल्यान म्हजें नांव चिखली पंचायतीचे मतदार वळेरेंत आयलें. ताका लागून आपणें बुधवारा मतदानाचो हक्क बजायलो अशें तांणी स्पश्ट केलें. ही वेंचणूक पक्ष पांवड्यार घेवची न्हय असो निर्णय सरकारान घेतिल्ल्यान पॅनल तयार करपाचो प्रस्नूच नाशिल्लो. पूण जे वेंचून येतले ते सरकारा वटेन येतले हातूंत दुबाव नाशिल्ल्याचें तांणी म्हणलें.
कुठ्ठाळीचे आमदार अँथनी वाझ हे मतदाना खातीर दुचाकी वयल्यान आयले. तांणी लेगीत आपणे पॅनल दवरूंक नाशिल्ल्याचें सांगलें. खूबशे जाण तेंक्या खातीर आयिल्ले. पूण आपणे तांची समजूत काडली. जे जैतिवंत जातले तांकां हांव कामां करतलो अशें दिसता तांणी जरूर म्हजे कडेन येवचें. कसलोच भेदभाव करिनासतना हांव तांचीं कामां करतलों अशें तांणी म्हणलें.
जे हारतले तांणी नाउमेद जायनासतना समाजीक कार्य सुरूच दवरचें अशें आवाहन वाझ हांणी केलें. विधानसभा वेंचणुकेंत उबे राविल्ले कॅप्टन विरयितो फर्नांडीस, ओलंसियो सिमोयश बी हांणी आपल्या मतादानाचो हक्क बजायलो.
कांय सुवातींनी किरकोळ वादावादी जावपाचे प्रकार घडले. वेळसांव हांगा एक बायल उमेदवार थेट मतदान केंद्रांत यो-वच करीत आशिल्ल्याचो दावो करून कागाळ केली. मजगतीं, आपूण ज्येश्ठ नागरिकांक मजत करताली. जांकां सारके दिसना तांकां मजत करपा खातीर आपणे योग्य ते सोपस्कार करून मतदान केंद्रांत वचत आशिल्ल्याचें ते बायल उमेदवारान स्पश्ट केलें.
कुठ्ठाळी पंचायतीचे आदले सरपंच सेनिया परेरा आनी आदले उपसरपंच रेमंड डिसा हांणी एकामेकांचेर मतदारांक पयशे वांटप करीत आशिल्ल्याचो आरोप केलो. आपली प्रतिमी म्हेळी करपाचो यत्न केल्ल्याचो दावो दोगांनीय केलो. मंगळारा रातच्या वेळार सेनिया परेरा आनी रेमंड डिसा हे पयशे वांटप करीत आशिल्ल्याचो दावो करीत घोळट्या पंगडाक आनी पुलिसांक आपयिल्लें. पूण डिसा हांचे कडेन पयशे मेळ्ळे नात. हाचे उरफाटें सेनिया परेरा ह्यो पयशे वांट्टात अशें आपल्या समर्थकांनी सांगिल्ल्यान आपूण थंय गेल्ल्याचें रेमंड डिसा हांणी स्पश्ट केलें.
वेळसांव हांगासरल्या स्पोर्टस प्राधिकरणांत मतदान केंद्र आशिल्लें. पूण थंय पावसाक लागून चिखल जाल्ल्यान मतदारांची गैरसोय जाली. ह्या प्रकरणांत संबंदितांक कळयलें. हे वेंचणुकेंत मिनी इंडिया प्रकल्प, दोट्टी रेल्वे मार्ग बी विशय मुखार आयले. ह्या विशयांचेर मतदार कितलो प्रतिसाद दितात तें निकाला उपरांत कळटलें. खूबशे आदले सरपंच, उपसरपंच, पंच हांणी परतून जैतिवंत जातले अशें सांगलें.
चिखली पंचायतीच्या प्रभाग क्रमांक चारांत शंकर कवठणकार हांकां दोळ्यांनी दिसना. ते खातीर तांणी मतदान केंद्रांत ब्रेल लिपीची मागणी केली. पूण पंचायत राज कायद्यांत तशी तरतूद करूंक नाशिल्ल्याचें तांकां सांगलें. ताका लागून तांकां हेरांचे मजतीन मतदान करचें पडलें. तांणी हे विशीं निरशेवणी उक्तायली. आपणें लोकसभा, विधानसभा वेंचणुकेंत स्वता मतदान केलां. पूण आतां आपणाक मजत घेवन मतदान करचें पडिल्ल्यान म्हजे मतदान गुपीत उरूंक ना अशें तांणी म्हणलें. संबंदितांनी पंचायत वेंचणुकेंत ब्रेल लिपी बॅलेट पेपर मेळटले अशी वेवस्था करची. ते खातीर पंचायत राज कायद्यांत दुरुस्ती करची. जेणे करून दोळ्यांनी दिसना तांकां कोणाचेच मजती बगर मतदान करूंक येतले अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
