भांगरभूंय | प्रतिनिधी
उजो पालोवपी दळांनी गळटी रोखडीच हाडली नियंत्रणांत
वास्को: मुरगांव बंदरांतल्या धक्यार टँकर बोटींतल्यान काल (मंगळारा) दनपारां अमोनिया लागसारच्या अमोनियाचो सांठो करपी टांकयेंत व्हरपाचें काम सुरू आसतना किरकोळ गळटी लागिल्ल्यान काम बंद केलें. उजो पालोवपी दळांनी आनी बोटीतले यंत्रणेक लागून गळटी रोखडीच नियंत्रणांत हाडिल्ल्यान कसलोच वायट प्रसंग घडलो ना.
पूण ह्या गळटेची गंभीर दखल घेवन मुरगांवचे अमदार संकल्प आमोणकार हांणी झुआरी अॅग्रोची मुरगांव बंदर वाठारांतली अमोनिया टांकी थंय सावन काडपाची मागणी केली. वेळ प्रसंगार आपूण लोकांक घेवन अमोनिया टांकयेचें कामकाज बंद करपाक फाटीं फुडें पळोवचो ना अशी शिटकावणी दिली.
अमोनिया घेवन आयिल्ली टँकर बोट मुरगांव बंदरांतल्या धको क्रमांका आठार नांगरून दवरल्या. ह्या टँकर बोटींतले अमोनिया लागसारच्या अमोनियाचो सांठो करपी टांकयेंत वाहिन्यांतल्यान अमनोनिया व्हरताले. त्या वेळार अमोनियाची गळटी जाल्ल्याचें लक्षांत आयलें. रोखडीच खबरदारीची उपाय येवजण करून काम बंद केलें, आनी उजो पालोवपी दळांक म्हायती दिली.
ह्या वेळार मुरगांव बंदर प्राधिकरण उजो पालोवपी दळ, झुआरी अॅग्रो उजो पालोवपी दळ, गोवा उजो पालोवपी दळ थंय रोखडेच पावले. बंबांतल्या उदकाचो तशेंच बोटी वयले यंत्रणेंतल्यान उदकाचो मारो करून गळटी नियंत्रणांत हाडली. रोखडेंच गळटीचे सुवातेर दुरुस्तीचे काम हातांत घेतलें.
ह्या प्रकाराक लागून कसलोच वायट प्रसंग घडलो ना. पूण मुरगांव बंदर वाठारांत आशिल्ली झुआरी अॅग्रोची अमोनियाचो सांठो करपी टांकी मात चर्चेंत आयली.
अमोनियाची गळटी लागिल्ल्याचें कळटकूच आमदार संकल्प आमोणकार हांणी पयसुल्ल्यान पळोवणी केली. तांणी अमोनियाची टांकी मुरगांवकारां खातीर टायम बाॅम आशिल्ल्याचो दावो केलो. अमोनियाचो सांठो करपी टांकी कितली घातक आसा हे संबंदी आपणे सेगीत आवाज काडला. विधानसभेंतूय आपणे हे संबंदी आवाज काडिल्लो. ते टांकये संबंदी मॉक ड्रील करचें अशी मागणी आपूण सेगीत करीत आसा. पूण ताचे कडेन आडनदर जायत आसा अशें आमोणकारान म्हणलें.
मुखार तांणी म्हणलें, हे टांकये संबंदी केन्ना आनी खंय मॉक ड्रील घेतले हें कळपाक मार्ग ना. ते मॉक ड्रील घेतात काय ना हें लेगीत आमकां खबर ना. मॉक ड्रील करतना थळाव्या लोकांचो वांटो आसूंक जाय. अमोनियाची गळटी लागले उपरांत नेमकें कितें करप हे संबंदी लोकांक म्हायती आसप गरजेची आसा. फाल्यां गळटी लागून कसलीय दुर्दैवी घडणूक घडल्यार ताका जापसालदार कोण असो प्रस्न आमोणकारान केलो.
मुरगांवकारां खातीर टायम बॉम आशिल्ली अमोनियाचो सांठो करपी टांकी दुसरी कडेन हालोवची ही आमची मागणी आसा. हे संबंदी आपूण यत्न करतलों अशें आमदार संकल्प आमोणकारान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
