भांगरभूंय | प्रतिनिधी
वास्को, प्रतिनिधी: मुरगांव पालिकेचे ऍम्बुलन्सचो सांबाळ योग्य तरेन जायनाशिल्ल्यान ती मदींच बंद पडटा. ताका लागून गरजे वेळार खाजगी ऍम्बुलन्स हाडपाक धांवचें पडटा. कांय दिसां पयलीं एका नगरसेवकाक तांच्या प्रभागांतल्या एका व्यक्तीची कूड मसंडभूंयत व्हरपा खातीर ऍम्बुलन्सची गरज आसली. पूण ती मोडिल्ल्याचें कळटांत तांणी ती स्वता पयशे मोडून दुरुस्त करून घेतली.
मुरगांव पालिकेकडेन दोन ऍम्बुलन्सी आसात. तांतल्या आदल्या ऍम्बुलन्सीचो चड वापर जायनाशिल्ल्यान ती परत परत मोडटा. दुसरी ऍम्बुलन्स वापरता. पूण केन्नाय तीय मोडटा.
हे विशीं मुरगांव पालिकेच्या संबंधितांनी ह्यो दोनूय ऍम्बुलन्सी बेगीन सारक्यो करपा संबंदी पावलां उबारपाची गरज आसा. पूण हाचे कडेन आडनदर जाता. ताका लागून गरजे वेळार त्यो मेळनात. तांकां खाजगी ऍम्बुलन्सी खातीर धांवचें पडटा. कूड हॉस्पिटलांतल्यान हाडपा खातीर वा मसंडभूंयत व्हरपा खातीर ऍम्बुलन्सीची गरज आसता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
