भांगरभूंय | प्रतिनिधी
वास्को, प्रतिनिधी: सिगारेट आनी हेर तंबाखू पदार्थ कायदो २००३ कलम ४ आनी ६ (अ) मोडिल्ले खातीर मुरगांव तालुको अंमलबजावणी पंगडान सबंधितां आड कारवाय करून १४०० रुपया दंड वसूल केले. हातूंत कांय बँको, वित्त कंपन्यो, फास्ट फूड गाडे आनी किराणा दुकानदारांचो आसपाव आसा.
गोवा कॅनचे समन्वयक रोलँड मार्टिन्स, मुरगांव म्हालाची जोड मामलेदार श्रृती कुमटेकार, सर्कल इन्स्पेक्टर हनुमंत मांद्रेंकार, तलाठी जितेंद्र कामत, वास्को शार भलायकी केंद्राचे सॅनिटरी इन्स्पेक्टर दयानंद ठक्कर, पुलीस शिपाय नयीम वलीकार हांचो आसपाव आशिल्ल्या पंगडान शार वाठारांतल्या कांय आस्थापनांक भेट दिली. तेन्ना थंय सिगारेट आनी हेर तंबाखूचे पदार्थ कायदो २००३ चीं कांय कलमां मोडिल्ल्याचें दिसून येता.
कांय आस्थापनांनी धुम्रपान मनाय संबंदीचे तखटे सारके लावंक नाशिल्ल्याचें दिसून येता. हे विशीं सगळे अहवाल दक्षीण गोंयचे जिल्होधिकारी आश्विन चंद्रू आनी सिगारेट आनी हेर तंबाखूजन्य पदार्थ कायदो जिल्हो पांवड्यावेले समन्वयक समितीचे वांगडे सचीव डॉ. सारह जॉर्ज हांकां दितले, अशें रोलँड मार्टिन्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
