भांगरभूंय | प्रतिनिधी
भांगरभूंय । प्रतिनिधी
मुरगांवः मुरगांव पालिका मंडळाच्या उपनगराध्यक्षपदार नाट्यमय घडामोडीं उपरांत रामचंद्र कामत हांची बिनविरोध निवड जाली. ह्या पदा खातीर भाजप आड भाजप असो सत्ता संघर्श तयार जाल्लो. मात विनोद किनळेकारान आपलो उमेदवारी अर्ज निमाणे फाटीं घेतिल्ल्यान कामत हांची वाट मेकळी जाली.
पालिका मंडळांतल्या भाजपा समर्थक नगरसेवकांतल्या रामचंद्र कामत आनी किनळेकार हांणी एकमेकां आड उमेदवारी अर्ज सादर केल्ल्यान मुरगांव तालुक्याचो पालक तशेंच पंचायत मंत्री माविन गुदिन्हो हांणी तांच्या कार्यालयांत कामत आनी किनळेकार हांचे समर्थन करपी नगरसेवकांत मुरगांवचो आमदार संकल्प आमोणकार आनी वास्कोचो आमदार कृष्णा साळकार हाचे हाजेरेंत मध्यस्थी करपाचो यत्न केलो. मात 17 नगरसेवकांनी कामत हाका पयलींच तेंको जाहीर केल्ल्यान ताणी उमेदवारी फाटल्यांन घेवपाक न्हयकार दिलो. ताका आदलो मंत्री मिलिंद नायक आनी आदलो आमदार कार्लुस आल्मेदा समर्थक नगरसेवकां सयत तीन अपक्ष नगरसेवकांचो तेंको आशिल्लो. एकंदर चित्र पळोवन विनोद किनळेकारान आपलो अर्ज फाटीं घेतलो आनी कामत हांची उपनगराध्यक्षपदार बिनविरोध निवड जाली. रामचंद्र कामत मिलिंद नायकाचे समर्थक आशिल्ल्यान ताका उपनगराध्यक्ष जावपा पसून आडावपा खातीर यत्न चलिल्ले अशें कांय नगरसेवकांनी सांगलें.
मंगळारा (25 एप्रील) सकाळीं 11 वरांचेर मुरगांवचो उपजिल्होधिकारी आनी निर्वाचन अधिकारी भगवंत करमली आनी पालिका मुख्याधिकारी जयंत तारी हांणी पालिका मंडळाचे खाशेले बसकेंत उपनगराध्यक्ष पदा खातीर वेंचणुकेची प्रक्रिया सुरू केली. मात कोरम जावंक नाशिल्ल्यान बसका अर्द वर फुडें धुकल्ली. उपरांत परत 15 मिनटां ती फुडें धुकल्ली. ते उपरांत वास्कोचो आमदार कृष्णा साळकार हांच्या वांगडा 20 नगरसेवक सभाघरांत आयले आनी विनोद किनळेकारान आपलो अर्ज फाटीं घेतलो आनी निर्वाचन अधिकारी करमली हांणी रामचंद्र कामत हांची उपनगराध्यक्षपदार बिनविरोध निवड जाल्ल्यचें जाहीर केलें.
अमय चोपडेकार हाणे उपनगराध्यक्षपदाचो राजिनाम दिल्ल्यान हें पद रिकामें जाल्लें. रामचंद्र कामत हाच्या गळ्यांत हें पद पडटलें अशी खबर सगल्यांत पयलीं ‘ भांगरभूंय ‘न दिल्ली. भाजप समर्थकां मदलें कथीत बंड निमाणे थंय पडून भांगरभूंयन दिल्ली खबर निमाणे सत थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
