भांगरभूंय | प्रतिनिधी
अॅंथनी बार्बोझाः 2007 चे वेंचणुकेंत दितले राजकी आरक्षण
मडगांव: गोंयच्या आदिवासी मंत्रालयाचे फुडारपण करपी मुख्यमंत्री डॉ. प्रमोद सावंत हांचेर आमचो विस्वास आसा. 2027 चे वेंचणुकेंत राजकी आरक्षण दिवन ते गोंयच्या एसटी समाजाक पूर्ण न्याय दितले अशें अँथनी बार्बोझा हांणी म्हणलें.
मडगांवां दक्षीण गोंय जिल्हो भाजप कचेरेंत आदिवासी फुडारी भगवान बिरसा मुंडा हांचे जयंती निमतान गोंय भाजप एसटी मोर्चा वतीन जनजाती गौरव दीन मनयलो. ह्या वेळार मडगांवचे आमदार दिगंबर कामत, नरेंद्र सावयकार, नगराध्यक्ष दामोदर शिरोडकार, जिल्हो पंचायत वांगडी सुरेश केपेकार, नगरसेवक मिलाग्रीना गोम्स हाजीर आशिल्ले.
एसटी मोर्चाचे अध्यक्ष प्रभाकर गांवकार हांणी हाजीर आशिल्ल्यांक येवकार दिलो. दिगंबर कामत हांणी भगवान बिरसा मुंडा हांच्या क्रांतीकारी कार्याचेर उजवाड घालो. कांय जाण फक्त राजकी आरक्षणाच्या कारणा वेल्यान आंदोलन करतात तो राजकी सुवार्थ सादपा खातीर अशें सांगलें. हाचे पयलीं केंद्रांतल्या भाजप सरकारान गावडा, कुणबी आनी वेळीप ह्या तीन समुदायांक अनुसुचीत जमाती म्हूण जाहीर केल्लें. येता ते वेंचणुकेंत गोंय विधानसभेंत राजकी आरक्षण मेळोवपा खातीर एसटी समुदायांचे प्रलंबीत सपन पुराय करपा खातीर केंद्र आनी राज्य सरकार सक्षम आसा.
सावयकार हांणी शिक्षण, भलायकी, खेळ आनी राजकी मळार स्वताक झोकून दिवपाचे वृत्तीची तोखणाय केली.
भाजप एसटी मोर्चाचे उपाध्यक्ष अँथनी बार्बोझा हांणी गोंयच्या एसटी समुदाया विशींच्यो समस्या सोडोवपाच्या गोंय सरकाराचे भुमिकेचेर समाधान उक्तायलें. हे खातर प्रक्रिया सुरू जाल्या आनी मुख्यमंत्री डॉ. प्रमोद सावंत, भाजप प्रदेशाध्यक्ष संदानंद तानावडे आनी हेर हे प्रधानमंत्री नरेंद्र मोदी हांचे सयत केंद्रीय फुडारपणाच्या सेगीत संपर्कांत आसात. मुख्यमंत्री डॉ. प्रमोद सावंत आनी रमेश तवडकार हांच्या फुडारपणा खाला सर्वपक्षीय फुडाऱ्यांचें एक शिश्टमंडळ अमीत शाह हांची भेट घेवपा खातीर दिल्लींत वतलें.
गोंय विधानसभेंत एसटीची राजकी आरक्षणाची मागणी लावन धरपा खातीर केंद्रीय गृह मंत्री आनी केंद्रांतल्या हेर मुखेल फुडाऱ्यां मुखार ती मांडटले अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
