भांगरभूंय | प्रतिनिधी
आदेशा आड ग्रामस्थांनी एकवटान काडिल्लो आवाज
म्हापशें: मार्ना शिवोली पंचायत सचिवाचे बदली आदेशा आड ग्रामस्थांनी एकवटान आवाज काडिल्लो. हाची दखल घेवन पंचायत संचालनालयान प्रशासकी कारणा खातीर आनी जनहितार्थ पंचायत सचिवाचे बदलेचो आदेश निमाणें रद्द केलो. हे विशींचो आदेश संचालक सिद्धी हळर्णकार हांणी जारी केला.
फाटल्या 18 मे दिसा पंचायत संचालकान मार्ना शिवोली पंचायतीच्यो सचीव स्मिता परब हांची बदली करून राजकुमार चोडणकार हांची नवे सचीव म्हूण ते सुवातेर नेमणुकेचो आदेश दिल्लो.
ह्या प्रकारा आड फाटल्या आयतारा जाल्ले ग्रामसभेंत ग्रामस्थांनी सचीव बदलीच्या आदेशा खातीर खर निरशेणी उक्तावन हो आदेश फाटीं घेवपाची मागणी केल्ली. तशेंच ग्रामस्थांनी सद्याच्या सचिवाचे बदलीचो आदेश फाटीं घेवपा खातीर सयांची मोहीम राबयिल्ली आनी हे विशींचें निवेदन पंचायत संचालनालयाचे सचीव आनी राज्याच्या मुख्य सचिवांक सादर केल्लें. तशेंच ग्रामस्थांच्या शिश्टमंडळान पंचायत संचालक सिद्धी हळर्णकार हांची लेगीत भेट घेवन तांचे कडेन कागाळी मांडल्यो आनी गांवच्या हिता खातीर आदेश फाटीं घेवपाची मागणीय केल्ली.
ते प्रमाण सोमारा पंचायत संचालकान पंचायत सचिवाच्या बदलीचो आदेश रद्द केलो. स्मिता परब ह्यो फाटल्या दोन म्हयन्यां सावन मार्ना शिवोली पंचायतीच्या सचीवपदाचो अतिरिक्त ताबो घेवन कार्यरत आसात.
ग्रामसेवक आशिल्ल्या आदल्या पंचायत सचिवान आपलीं कामां सारकीं करूंक नाशिल्लीं. 14 व्या वित्त आयोगा कडेन संबंदीत काळांत घोळ करून 15 व्या वित्त आयोगाचें काम लेगीत अपलोड करूंक ना असो आरोप ग्रामस्थांनी ग्रामसभेंत तांचेर दवरिल्लो, आनी तांच्या सचिवपदाचे नेमणुकेक आक्षेप घेतिल्लो.
पंचायत सचिवांच्या बदलीचो आदेश रद्द केल्ले खातीर खोस उक्तायतना ज्योकीं बार्रोसान म्हणलें, जेन्ना लोक बऱ्या कारणा खातीर एकठांय येतात तेन्ना चमत्कार घडटा. कितलोय ताकदीचो राजकारणी आसूं लोकांच्या दबावा उपरांत आदेश फाटीं घेवचोच पडलो.
आदल्यो सरपंच आल्बा सिक्वेरान म्हणलें, एकवटीत यत्नांक लागून सकारात्मक परिणाम मेळिल्ल्यान आमी खोशी आसात. कारण आदले सचीव जे ग्रामसेवक आसात ते पंचायतीचो कारभार वेवस्थीत हाताळी नाशिल्ले.
महेश धारगळकारान म्हणलें, फाटल्या चार म्हयन्यां पयलीं आदले सचीव पंचायतींत आशिल्ले, ते योग्य रितीन कर्तव्य पार पाडिनाशिल्ले. आरटीआयचे अर्ज लेगीत प्रलंबीत दवरताले. आमी हे विशीं पंचायत संचालकांक पत्र बरयिल्लें, आनी ग्रामस्थांच्या दबावाक लागून बदलीचो आदेश निमाणें फाटीं घेवचो पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
