भांगरभूंय | प्रतिनिधी
वास्को, प्रतिनिधी: गोंय राज्य पाणथळ प्राधिकरणा वतीन मायमोळे तळ्याची उदरगत करतले. ह्या कामांत कोणेंच आडखळी हाडच्यो न्हय. तशेंच लोकांक भुलोवचें न्हय. हे विशीं कसलीय समस्या आसल्यार ताचेर चर्चा करून उपाय काडुया, असो उलो वास्कोचे आमदार कृष्णा साळकार हांणी मारलो. मायमोळे तळ्याची उदरगत म्हळ्यार वास्कोचो बदल घडोवपी हो प्रकल्प.ताका लागून विरोधकांनी गरजे विणे वावड्यो पसरुंवच्यो न्हय. वास्कोचे उदरगती खातीर सगळ्यांक एकवटान हो प्रकल्प उबारचो, असो उलो तांणी मारलो.
मायमोळे तळ्याची उदरगत जाल्यार थंय बोटींग सुरू करपाक मेळटलें. लोकांनी हरकती आसल्यार त्यो मांडच्यो. ताचेर योग्य उपाय काडुया. हाका कोमुनिदादी कडल्यान सहकार्य मेळटा, अशें साळकार हांणी सांगलें.
ह्या तळ्याचे उदरगतींत आडखळी हाडल्यार फुडाराक अतिक्रमण जावन तें शाणटलें. ह्या तळ्या लागसारा आशिल्ल्या धाकतळयेचे देगेर कांय जाणांनी अतिक्रमण करपाक सुरवात केल्या. तांतल्या चार जाणांक अतिक्रमण मोडपा खातीर मुरगांव पालिकेन नोटीस धाडल्या, अशी म्हायती तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
