भांगरभूंय | प्रतिनिधी
म्हापशें: माडेल-थिये मोबायलाचें दुकान फोडून 64,500 रुपयांच्या मुद्देमालाची चोरी केल्ल्या प्रकरणांत अभिषेक कुमार सिंग (23, रा. बिहार) आनी कल्याण कमल हॅण्डीकी (26, रा. आसाम) ह्या दोगां दुबावितांक अटक केल्या. कोलवाळ पुलिसांनी ह्या प्रकरणाचो येसस्वी तपास लायलो.
ही चोरयेची घडणूक फाटल्या बुधवारा 3वेर मध्यानरातीं घडिल्ली. बिरेस्तारा सकाळीं दुकान फोडिल्ल्याचें दिसून येतकूच दुकान धनी सूर्यकांत कामत (तोरशें) हांणी कोलवाळ पुलिशेंत कागाळ दाखल केल्ली.
दुबावितांनी माडेल हांगासरल्या ग्रीनलॅण्ड रॅस्टोरॅण्टा कुशीच्या साईश्रद्धा रिसेल आनी रिपेरींग ह्या दुकानाचें शटर बागोवन दुकानांत चोरी केल्ली. दुकानांतल्या वेगळ्यावेगळ्या कंपनीचे दोन नवे आनी पांच पोरणे मोबायल मेळून 63 हजारांचे सात मोबायल फोन आनी देड हजार रुपया रोख मेळून 64 हजार 500 रुपयांचो मुद्देमाल चोरून व्हेल्लो. हो सगलो चोरयेंतलो मुद्देमाल पुलिसांनी दुबावितां कडल्यान जप्त केला.
पुलीस निरिक्षक सोमनाथ माजीक हांच्या मार्गदर्शना खाला उपनिरिक्षक मंदार परब, हवालदार रामा नायक, कॉन्स्टेबल सुलेश नायक आनी साज्जो देसाय ह्या पंगडान कॉल मोनीटरींग सेलाच्या आदारान म्हायती एकठांय केली आनी दुबावितांक कुंडय फोंडें सावन अटक केली.
दुबावीत आरोपी अभिषेक आनी कल्याण हे दोगूय कुंडय उद्देगीक वसणुकेंतले एके कंपनींत कामाक आशिल्ले. ते कुंडय भाड्याचे कुडींत राबित्याक आशिल्ले. दुबावितांचो आनीक चोरी प्रकरणांत हात आसुये असो दुबाव पुलिसांनी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
