भांगरभूंय | प्रतिनिधी
पणजी, प्रतिनिधी ः जुलयांत बालरथ कर्मचाऱ्यांच्यो वेगवेगळ्यो मागणी पुराय करतले, अशें सरकारान उतर दिल्लें. पूण, एकूय मागणी अजून पुराय जावंक ना. येवपी विधानसभा अधिवेशना मेरेन त्यो पूर्ण जावंक ना जाल्यार राज्यभरांतली बालरथ सेवा परतून बंद करतले अशी शिटकावणी कामगार फुडारी स्वाती केरकार हांणी दिल्या. मंगळारा पणजे जाल्ले पत्रकार परिशदेंत ती उलयताली.
जुलयांतल्या अधिवेशना वेळार आमी आंदोलन केल्लें. बालरथ कर्मचाऱ्यांचो पगार वाडोवप, पगार शिक्षणीक संस्थांक दिवचे बदला थेट बँकेंत जमा करप, कर्मचाऱ्यांचे सेवे संबंदी अधिकृत आदेश जारी करप अशी मागणी आमी केल्लीं. पूण आश्वासनां दिवन लेगीत तीं पुराय जालीं नात. कर्मचाऱ्यांक अजूनय आदी आशिल्लो तितलोच आनी तेच पद्दतीन पगार दितात. तो लेगीत उसरां असो गंभीर आरोप केरकार हांणी केलो.
बालरथ कामगारांकय कामा वयल्यान कारणा बगर काडून उडयतात अशें तिणें सांगलें. नावेलींतले एका शिक्षणीक संस्थेन कारणा बगर इकरा वर्सां सेवा दिवपी दोन ड्रायव्हरांक काडून उडयल्यात. ते फाटलें कसलेंच कारण दिवपाक ते तयार नात. हे येवजणे प्रमाण सरकार अनुदान दिता तरी सगळे अधिकार शिक्षणीक संस्थांक दिल्ले आसात. कांय शिक्षणीक संस्था हाचोच गैरफायदो घेवपाक लागल्यात, अशें केरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
