भांगरभूंय | प्रतिनिधी
जीत आरोलकार ः थळाव्या पत्रकारां कडेन आमदारान सादलो संवाद
भांगरभूंय प्रतिनिधी
पेडणें ः मांद्रेंच्या जुनसवाड्यार आपत्कालीन सेवा प्रकल्प आसा. तातूंतल्या कांय वाठारांत स्वतंत्र पुलीस स्टेशन उबारपाची प्रक्रिया सुरू जाल्या. रोखडेंच पुलीस स्टेशन उबारपाचें काम पूर्ण जातलें अशें उतर आमदार जीत आरोलकार हांणी दिलें. आमदार जीत आरोलकार हांणी आपल्या कार्यालयांत थळाव्या पत्रकारां कडेन उलयतना वयली माहिती दिली.
मांद्रें मतदारसंघांतल्या दर्यादेग वाठारांत देश-विदेशांतल्यान लाखांनी पर्यटक येतात. ह्या पर्यटकांच्या वस्तू फारावपाच्यो घडणुको घडटात. केन्ना चोरयो जातात, मारामारी जाता. कागाळ करपाक पुलिशेंत वतलो म्हणल्यार पेडण्यां वचचें पडटा. ताका लागून वेळ फुकट वता. हाची गंभीर दखल हांवें घेतल्या. मुख्यमंत्री डाॅ. प्रमोद सावंत हांच्या कानार ही गजाल घाल्या. तांणी मनार घेतलां. मांद्रें मतदारसंघा खातीर स्वतंत्र पुलीस स्टेशन उबारचें अशी लोकांची मागणी आसा अशेंय तांकां सांगलां. तांणी तशें आस्वासन दिलां. सध्या हंगामी पद्दतीन मांद्रेंच्या जुनसवाड्यार जंय आपत्कालीन सेवा प्रकल्प आसा थंय स्वतंत्र पुलीस स्टेशन उबारपा खातीर पावलां उखल्ल्यांत. तशी प्रक्रिया सुरू जाल्या अशें जीत आरोलकार हांणी सांगलें.
पर्यटन हंगामांत व्हडा प्रमाणांत दर्यादेग वाठारांत गैरवेव्हार जातात. कागाळी करपाच्यो आसत जाल्यार पेडणें पुलीस स्टेशनार वचचें पडटा. अडचणीय खूब येतात. ते भायर हरमला जी पुलीस चौकी आसा थंय वचूंक वेवस्थीत पांयवाटूय ना. ताका लागून नागरीक आनी पर्यटकाची गैरसोय जाता. लोकांचो आनी पर्यटकांचो हो प्रस्न सुटचो म्हणून हे सुवातेर एक स्वतंत्र पुलीस स्टेशन जावचें अशें म्हाका दिसता आनी तशे म्हजे यत्न चालू आसात अशें आरोलकार हांणी सांगलें.
फाटल्या दोन दिसां आदीं उत्तर गोंय पुलीस अधिक्षक शोबित सक्सेना, म्हाल पुलीस उपअधिक्षक सिद्धांत शिरोडकार आनी पेडणें पुलीस निरिक्षक दत्ताराम राऊत हांणी हे नियोजीत पुलीस स्टेशन सुवातेची पळोवणी केल्या. आनी म्हजे कडेन हे विशीं चर्चाय केल्या पुलीस अधिकारी रोखडेच हे विशींचो अहवाल वरिश्ठांक धाडटले आनी उपरांत मुख्यमंत्री डाॅ. प्रमोद सावंत योग्य तो निर्णय धेतले अशें तांणी सांगलें.
‘रवींद्र भवन मध्यवर्ती सुवातेर उबारतले’
मांद्रें मतदारसंघांतल्यान पर्यायान पेडणें म्हालांत व्हडा प्रमाणांत कलाकार आसात. ह्या कलाकारांक तांच्या हक्काची अशी स्वतंत्र माची ना. नवे कलाकार घडोवपा खातीर आनी तांकां योग्य तें प्रशिक्षण दिवपा खातीर शिक्षकूय नात. रवींद्र भवना सारको प्रकल्प पेडणें म्हालांत आयज मेरेन जावंक ना. आदल्या आमदाराक आनी मंत्र्यांक लेगीत रवींद्र भवन उबारपाक येस येवंक ना. पूण हांवें गोंय विधानसभेंत रवींद्र भवनाचो प्रस्ताव मांडला. तुयें पठाराचेर सरकाराची दोन लाखां परस चड जमीन आसा, ते सुवातेर प्रकल्प उबारचो अशीय सरकाराक विनंती केल्या. म्हजे विनंतेक मंजुरी मेळ्ळ्या. पेडणें म्हालाक आनी म्हालांतल्या सगल्या कलाकारांक हक्काचें स्थान मेळटलें. रवींद्र भवन मध्यवर्ती सुवातेर उबें जातलें असो विस्वास जीत आरोलकार हांणी उक्तायला.
‘बेरोजगार तरणाट्यांक संदी दितलों’
मांद्रें मतदारसंघांत आनी पर्यायान म्हालांत बेरोजगारीची गंभीर समस्या आसा. सगल्यांक सरकारी नोकरी मेळप कठीण आसा. पूण म्हज्या मतदारसंघांत पर्यायान मांद्रें मतदारसंघांत सुंदर अशी दर्यादेग आसा. हे दर्यादेगेर पर्यटन वेवसायाक संद आसा. तातूंतल्यान हजारांनी रोजगार निर्माण जावंक शकतात. हे आदीं पर्यटन हंगामांत जे वेवसाय करतात, उद्देग करतात तांकां सगले तरेच्यो सुविधा सरकाराचे वतीन दिवपाचेर म्हजो भर आसतलो. बेरोजगार तरणाट्यांक संदी दितलों अशें आमदार जीत आरोलकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
