भांगरभूंय | प्रतिनिधी
बेकायदो शॅक्स बंद करपाचो खंडपिठाचो आदेश
पेडणें: गोंय प्रदुशण नियंत्रण मंडळाची परवानगी घेनासतना मांद्रें मतदारसंघांतल्या मोरजी, मांद्रें, हरमल दर्यादेग वाठारांनी सुरू आशिल्ले बेकायदो शॅक बंद करपाचो आदेश मुंबय उच्च न्यायालयाच्या गोंय खंडपिठान दिले उपरांत वेवसायिकां मदीं भिरांतीचें वातावरण पातळ्ळां. 16 शॅक्सांक गोंय प्रदुशण म्हामंडळाची परवानगी नाशिल्ल्यान तांचेर कारवायेची तरसाद उबी आसा.
ह्या विशयाचेर आमदार जीत आरोलकारान सांगलें, विधानसभा सुरू जावचे पयलीं आपणें मुख्यमंत्री, पर्यटन मंत्री, सीआरझॅड विभागाचे संचालक, प्रदुशण म्हामंडळाचे अधिकारी हांचे कडेन चर्चा करून थळाव्या शॅक्स वेवसायिकांक संरक्षण दिवपा विशीं चर्चा केल्या. सरकार थळाव्यांक अभय दितलें असो विस्वास तांणी उक्तायलो.
मुखार उलयतना आरोलकारान म्हणलें, मांद्रें मतदारसंघांतल्या दर्यादेग वाठारांनी जे थळावे बेरोजगार तरणाटे आसात, तेच तरणाटे आपलें पोट चलोवपा खातीर शेक वेवसाय थाटत आसतात, आनी अशा तरणाट्यांक अभय दिवपा खातीर आपणे सरकारा कडेन यत्न केल्यात. मुख्यमंत्री डॉ. प्रमोद सावंत हे हातूंतल्यान नक्कीच मार्ग काडटले असो विस्वास तांणी उक्तायलो.
उत्तर गोंयांतल्या कांय दर्यादेगांनी बेकायदो शॅक्स सील करपाचे काम झुजा पांवड्यार सुरू आसा. ही हुमकळटी तरसाद मांद्रें मतदारसंघांतल्या शॅक्स वेवसायिकांचेर आशिल्ल्यान वेवसायीक भियेल्यात. पर्यटन हंगामांत आनी पर्यटनाचे थोडेच दीस उरिल्ल्यान ही कारवाय जाली जाल्यार वेवसायिकांक व्हड प्रमाणांत अर्थीक लुकसाण जावंक शकता. मांद्रें मतदारसंघांत वट्ट 16 शेक्सांक गोंय प्रदुशण म्हामंडळाची परवानगी नाशिल्ल्यान तांचेर कारवायेची तरसाद उबी आसा.
हे विशीं पेडणेंचे मामलेदार अनंत मळीक हांचे कडेन संपर्क सादलो तेन्ना दर्यादेग वाठारांतले बेकायदो शॅक्स केन्ना सील करचे हे खातीर अजून मेरेन कचेरेंत लेखी पत्र पावूंक नाशिल्ल्यान केन्ना कारवाय जातली हे विशीं निश्चीत सांगूंक येवचें ना अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
