भांगरभूंय | प्रतिनिधी
पेडणें: मांद्रें मतदारसंघांतले रस्ते अशीर आनी तातूंत वीज खात्यान घातक केल्ले रस्ते. तशेंच रस्त्यां कडेन भौशीक बांदकाम खात्यान आडनदर केल्ल्यान जाग्याजाग्यांनी येरादारीची कोंयडी जावंक लागल्या. अशीच कोंयडी काल (शुक्रारा) सांजवेळा जुनसवाडो गार्डना कुशीक जाली. एके वटेन गार्डन जाल्यार दुसरे वटेन स्टॉल. ताचे कुशीक वीज खात्याच्या इमारतीच्या बांदकामाचें साहित्य. अशा घातक स्थितीक लागून येरादारीची कोंयडी जाली. हे कोंयडेचेर सरकारान जाता तितले बेगीन उपाय येवजण करची अशी मागणी काँग्रेसीचे फुडारी प्रमेश मयेंकार हांणी केली.
ह्या वाठारांतले रस्ते पयलींच अशीर आनी फोंडकुलांनी भारल्यांत. ह्या रस्त्या वयल्यान वाहनां चलयतना कमर मोडून येता. तशेंच दुचाकी वाहनांची व्हड प्रमाणांत मोडतोड जाता अशी वाहन चालकांची कागाळ आसा. ह्या अशीर रस्त्यार दोनूय वटांनी वाहनां पार्क करून दवरिल्ल्यान येरादारीक आडखळ जाता. नो पार्कींग झोन आशिल्ल्या वाठारांतूय व्हड प्रमाणांत वाहनां पार्क करून दवरतात, आनी ताका लागून येरादारीची कोंयडी जायत आशिल्ल्याचें चित्र दीसपट्टें दिसून येता.
काल जाल्ले कोंयडेचेर प्रमेश मयेंकार हांणी पेडणें येरादारी पुलीस निरिक्षक विजय विश्वजीत चोडणकार हांचे कडेन संपर्क सादून येरादारी कोंयडेचेर नियंत्रण मेळयलें. ते खातीर मयेंकार हांणी निरिक्षक विश्वजीत चोडणकार हांचे उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
