भांगरभूंय | प्रतिनिधी
अॅड प्रसाद शाहपूरकार हांच्या उपोशणाची घेतली दखल
पेडणें: जुनसवाडो मांद्रें आम्रपाली वाठारांतल्या सर्वे क्रमांक 365/1 चलतलीं बेकायदो बांदकामां थांबोवपाचो आदेश ग्रामपंचायतीन दिला. ‘स्वराज्य’ संस्थेचे वांगडी अॅड. प्रसाद शहापूरकार हांणी ह्या प्रकरणांत नगर नियोजन खात्या सयत मामलेदार, पंचायत तशेंच जिल्होधिकारी कचेरेंतल्या घोळट्या पंगडा कडेन कागाळी केल्ल्यो. पंचायत मंडळान दोन फावटी पळोवणी केल्ली. पूण नगर नियोजन खात्यान बांदकामाक परवानगी दिल्ल्यान कसलीच कारवाय जाली ना.
उपरांत घोळट्या पंगडान पळोवणी केले उपरांत हे सुवातेंत साडेतीन हजार चौखण मिटर लांब आनी 7 मिटर खोल क्षेत्रफळांत दोंगर कापणी करून जमनींची रचणुकूच बदलून उडयिल्ल्याचें ह्या पंगडाक दिसून आयलें. ह्या अहवाला उपरांत अॅड. प्रसाद शहपूरकार हांणी सेगीत फाटपुरवण करून लेगीत नगर नियोजन खात्यान कसलीच कारवाय करूंक नाशिल्ली. पूण पळोवणी अहवाला प्रमाण दोंगर कापपा खातीर कोणेंच परवानगी दिवंक नाशिल्ल्याचें उक्तडार आयिल्लें. तरी लेगीत पुलिसां कडेन एफआयआर नोंदणी खातीर कळयनासतना फक्त थंय नदर दवरात इतलीच सुचोवणी नगर नियोजन खात्यान केल्ली.
ह्या बेकायदो प्रकरणांत कारवाय जायत नाशिल्ल्यान शहापूरकार हांणी 14 ऑक्टोबर दिसा एका दिसाचें लाक्षणीक उपोशण मांद्रें हांगासरल्या भाऊसायब बांदोडकार पुतळ्या कडेन करपाचें जाहीर केल्लें. त्या दिसा उपोशण थळार पंचायत मंडळ तशेंच स्वराज संस्थेचे पदाधिकारी शहापूरकार हांकां तेंको दिवपा खातीर एकठांय जाल्ले.
ह्या प्रकरणांत सरपंच अमीत सावंत हांणी काल (सोमारा) दखल घेवन इस्प्रावा लक्झरी रिअल्टी थ्री एलएलपी लिमिटेड हे कंपनीक नगर नियोजन खातें जोड पळोवणी करी मेरेन काम बंद दवरपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
