भांगरभूंय | प्रतिनिधी
कागाळ पेडणें पुलिसां कडेन वर्ग
पणजी: मांद्रें वाठारांत बनावट कागदपत्रां तयार करून सुमार 1 लाख चौखण मिटर जमीन हडप केल्ल्याचें प्रकरण मुखार आयलां. ह्या प्रकरणांत विशेश तपास पंगडा कडेन (एसआयटी) कागाळ दाखल केल्ली. ही कागाळ एसआयटीन पेडणें पुलिसां कडेन वर्ग केल्या.
मेळिल्ले म्हायती प्रमाण ह्या प्रकरणांत अनंत मोरेश्वर पार्सेकारान विशेश तपास पंगडा कडेन (एसआयटी) कागाळ दाखल केल्ली. ते प्रमाण तांचे पूर्वज नारायण गोविंद पार्सेकार हांची 1 लाख 361.64 चौ.मिटर जमीन बार्देसांतल्या एका मनशान बनावट कागदपत्रां तयार करून आनी मूळ धनयाच्या वारसदारांक वगळावन दुसऱ्या एका थळाव्या मनशाच्या नांवार करून घेतली. उपरांत संबदीत जमीन त्या मनशाच्या कायदेशीर वारसदाराचें नांवान करून विकती घेतिल्ल्याचे म्हणलां.
ही म्हायती मुखार आयले उपरांत पार्सेकारान एसआयटी कडेन धांव घेवन संबंदीत दुबाविता आड कागाळ केली. उपरांत एसआयटीन संबंदीत कागाळीची दखल घेवन चवकशी सुरू केली. हे खातीर एसआयटीन थळावे मांद्रें पंचायती कडेन पत्र वेव्हार करून संबंदीत जमनीक वंय घाल्ल्याचें नदरेक आयलें. उपरांत एसआयटीन कागदपत्रां मागयलीं. ह्याच वेळार संबंदीत प्रकरण एसआयटीच्या अधिकार क्षेत्रांत येनाशिल्ल्याचे मुखार आयले उपरांत तें थळावे पेडणें पुलिसां कडेन वर्ग केलां.
ह्या प्रकरणांत पेडणें पुलिसांनी चवकशी सुरू करून कागाळदार आनी विरुद्ध पक्षकारांक आपयिल्ल्याची म्हायती मुखार आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
