मयेंचें केळबाय देवूळ उक्तें

भांगरभूंय | प्रतिनिधी

दिवचल मामलेदारान जारी केलो आदेश

फाटले 15 दीस बंद आशिल्लें केळबायवाडो मयें हांगासरलें देवी केळबायचें देवूळ काल (मंगळारा) दनपारां दिवचलचे मामलेदार राजाराम परब हांणी एक आदेश जारी करून ब्राह्मणा वरवीं उक्तें केलें. देवस्थान समितीन देवूळ उक्ते करपा संबंदी दिल्ल्या पत्राच्या आदारान मामलेदार राजाराम परब हांणी हो आदेश जारी केलो. दनपारां सुमार 3 वरांचेर मामलेदारान ब्राह्मणांक देवळाची चावी दिवन देवळांत दाखल जाले आनी तांणी देवळाचें दार उक्तें केलें. देवळाचें दार उक्तें करतकूच सभामंडपांत हाजीर आशिल्ल्या भाविकांनी केळबाय माता की जय असो जयघोश केलो.

फाटल्या 26 मार्च सावन महाजनकी वादाक लागून देवूळ बंद आशिल्लें. ताका लागून ह्या देवळांत येवपी भाविकांक देवीचें दर्शन घेवंक मेळ्ळें ना. तांच्यो भावना दुखावल्यो. ताका लागून देवस्थान समितीन काल मामलेदारांक देवूळ उक्तें करपा संबंदी निवेदन सादर केलें. त्या निवेदनाचेर मामलेदारान आपलो आदेश जारी केलो.

देवळाचे पुरयत शिवराम वझे वा तांच्या कुटुंबांतल्या वांगड्यान देवस्थान समिती कडल्यान देवळाच्यो चाव्यो घेवच्यो आनी देवूळ उक्तें करचें. देवीच नित्यपुजा करची. फक्त पुरयतान पुजा करची हेर खंयच्याय व्यक्ती कडल्यान देवळांत हेर कसलीच विधी जावंक दिवची न्हय. देवूळ सांजवेळ मेरेन उक्तें दवरले उपरांत बंद करून चाव्यो समिती कडेन दिवच्यो. सगल्या भाविकांनी देवळाचें पावित्र्य राखचें. तशेंच दिवचल पुलीस निरिक्षकांनी कायदो आनी सुवेवस्था खरपणान पाळची. तशेंच कोणूय अनुचीत प्रकार करीत आसल्यार कारवाय करची. अश्यो अटी मामलेदारान आदेशांत घाल्यात. हो आदेश देवळांत लायला.

दनपारां देवळाचें दार उक्तें करपा खातीर मादलेदार पुरयताक घेवन आयले त्या वेळार देवळांत केळबायवाडो हांगासरले भावीक व्हड संख्येन हाजीर आशिल्ले. तांणी केळबाय माता की जय असो जयघोश केलो. 15 दिसा उपरांत बंद आशिल्लें देवीचें देवूळ परतून उक्तें जाल्ल्यान सगल्यांनी खोस उक्तायली.