मडगांव पालिकेची किरकोळ नुस्तें विक्रेत्यांचेर कारवाय
भांगरभूंय | प्रतिनिधी
नवो जागो दिवचो: विक्रेत्यांची मागणी
मडगांव, प्रतिनिधी : एसजीपीडीए ठोक नुस्त्या बाजारा भायर किरकोळ नुस्त्याची विक्री थांबयतले अशें मडगांव पालिकेन कळीत केल्लें. ते प्रमाण बिरेस्तारा सकाळीं ह्या नुस्तें विक्रेत्यांक समजायलें तेन्ना तांणी जागो उपलब्ध करून दिवपाची मागणी करीत विक्री चालूच दवरली. उपरांत पालिका कर्मचार्यांनी विक्रेत्यांचें सामान, नुस्तें जप्त केलें.
उच्च न्यायालयान पालिका प्रशासना सयत एसजीपीडीए आनी संबंधितांक एसजीपीडीएच्या घाउक नुस्तें मार्केटांतली नितळसाण आनी थर्माकोल बॉक्साचो कोयर, बारीक सारीक नुस्तें विक्री ह्या सगळ्या प्रस्नांचेर कितेंय उपाय करपाक सांगिल्लें. एसजीपीडीए आनी पालिकेन किरकोळ नुस्तें विक्री पुरायेन बंद करतले अशें न्यायालयांत सांगिल्लें. पूण ताचेर आजूनय कारवाय जावंक नाशिल्ली. उपरांत उच्च न्यायालयान ही नुस्तें विक्री बंद करून दोनूय वटेन उब्यो आसपी गाडयो काडपाचे निर्देश दिले. बुधवारा मुख्याधिकारी, एसजीपीडीएचे वांगडी सचीव, होलसेल फिश मार्केटाचे पदाधिकारी आनी हेर वांगड्यां वांगडा हांगची पळोवणी केल्ली. मुख्याधिकारी गौरीश शंखवाळकार हांणी बिरेस्तार मेरेन ही बारीक सारीक नुस्तें विक्री बंद करतले अशें स्पश्ट केल्लें.
एसजीपीडीएचे अधिकारी, पालिका कर्मचारी, पुलीस कारवाये खातीर बिरेस्तारा मार्केटा भायर गेल्ले. बोटकार, रांपणकारां खातीर पर्यायी जागो उपलब्ध करून दिवचो अशी मागणी ह्या वेळार केली. एसजीपीडीएच्या अधिकार्यांनी किरकोळ नुस्तें विक्रेत्यांक समजायले. उच्च न्यायालयाच्या आदेशा प्रमाण ही कारवाय केल्ल्यान घाउक मार्केटांत किरकोळ मासळी विक्री करपाक बंदी आसा. तशेंच मार्केटा भायर विक्री करची न्हय अशे आदेश आशिल्ल्याचें सांगलें.
समजावन लेगीत नुस्तें विक्रेत्यांनी नुस्तें विकप चालूच दवरिल्लें. पयलीं पर्यायी सुवात उपलब्ध करून दिवची अशीं मागणी त्या नुस्तें विक्रेत्यांनी केली. उपरांत पुलिसांच्या बंदोबस्तांत पालिका कर्मचार्यांनी मार्केटाचे भायले वटेन नुस्तें विक्री करप्यांचे नुस्त्यांचे पाटले, क्रेट, हेर सामान उखलून गाडयेन घाले. बर्फ भरपी गाडयेच्यो क्रेटीय जप्त करून कारवाय केली तेन्ना मार्केटा भायर विक्री बंद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
