भांगरभूंय | प्रतिनिधी
शॅडो कावन्सिला कडल्यान चवकशेची मागणी
मडगांव: पालिकेच्या गॅरेजीतले ट्रक सद्या फेस्ता निमतान रिंगरोडाचेर उबे केल्यात, आनी ह्या ट्रकांतल्यान डिझेलाची चोरी जाली. तशेंच इंधनाची गळटीय जायत आसा. ह्या प्रकरणाची चवकशी करून दोशींचेर कारवाय करपाची मागणी शॅडो कावन्सील फॉर मडगांव वतीन केल्या.
शॅडो कावन्सील फॉर मडगांवचे संयोजक सावियो कुतिन्होन रिंगरोडा वयल्या वाहनांची पळोवणी केली आनी पालिकेच्या वाहनांतल्यान डिझेलाची गळटी जायत आशिल्ल्याचें दाखोवन दिलें. मडगांवकारांच्या पयशांतल्यान पालिके कडल्यान वाहनांक इंधनाची पुरवण जाता. सीसीटीव्ही कॅमेरे आसतना पालिकेतली 50 हजारांची रक्कम चोरयेक वता आनी पालिका गॅरेजींत सुरक्षा रक्षक आसून लेगीत तीन ट्रकांच्या इंधन टांकयांचे कुलप तोडून इंधनाची चोरी जाता हो प्रकार गंभीर आसा.
मेळिल्ले म्हायती प्रमाण एका दिसां पयलींच ह्या ट्रकांनी डिझेल भरिल्लें. घरांतल्या वाहनांची इंधन टांकयेची गळटी जायत जाल्यार रोखडीच दुरुस्ती करतात. अशेच तरेन पालिकेच्या भौशीक वाहनां विशीं कित्याक जायना? असो प्रस्न कुतिन्होन केलो. पालिके कडल्यान डिझेल चोरी प्रकरणांत तशेंच गाडयेंतल्यान जावपी इंधन गळटी प्रकरण गंभीरपणान घेवन खोलायेन चवकशी जावची अशी मागणी कुतिन्होन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
