भांगरभूंय | प्रतिनिधी
मडगांव: गोंय घरगुती कामगार संघटणे वतीन कामगारांच्या विवीध मागण्यां खातीर मडगांवां रॅली काडली. घरगुती काम करप्यांकूय मानसन्माना सयत कामांची वेळ थारावची आनी तांच्या कामाचो योग्य मोबदलो तांकां मेळचो अशे मागणे खातीर ‘वल्ड डे फॉर डिसेंट वर्क’ ह्या दिसा कामगारांनी रॅली काडली.
गोंय घरगुती कामगार संघटणेच्या वांगड्यां कडल्यान मडगांवां पालिके मुखा वेल्या गार्डना भोंवतणी रॅली काडली. ह्या वेळार तांच्या हक्कांची पांयमल्ली जावची न्हय आनी कामगार म्हूण तांकांय मान मेळचो अशे तरेच्या मागण्यांची घोशणा केली. उपरांत ग्रेस चर्च हॉलांत कामगारांक तांच्या हक्कांची जाणीव करून दिली.
घरगुती काम ह्या कामाकूय मान्यताय मेळची. तशेंच घरगुती काम करपी कामगारांकूय कामगारांचो दर्जो मेळचो अशें सांगलें. घरगुती काम करपी कामगारांकूय हेर कामगारां प्रमाण वागोवचें. तांकांय तांचे हक्क मेळचे. हेर कामगारां प्रमाण सुटी मेळची हे खातीर चळवळ सुरू केल्या. तशेंच घरगुती कामगारांचेर कसलोय अत्याचार जाल्यार लेगीत संघटणे कडल्यान आवाज काडटात. कांय वेळार घरगुती कामगारांक वेळार पगार मेळना. कांय वेळार उणो पगार दितात. कसल्योय अडचणी आयल्यार पगार उणो दितात. अशे प्रकार घडत आशिल्ल्यान हाचेर घरगुती कामगार संघटणा कार्य करीत आशिल्ल्याचें आवढा व्हिएगश हांणी सांगलें. तशेंच घरगुती कामगारां वयल्या अत्याचारा विशीं आवाज काडटले अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
