मडगांवकारांनी पक्ष पळयनासतना म्हाका वेंचून दिलाः दिगंबर कामत

भांगरभूंय | प्रतिनिधी

भारतीय जनता पक्ष म्हाका नवो न्हय; हांव देवाचेर विस्वास दवरतां

मडगांव: भारतीय जनता पक्ष म्हाका नवो न्हय. ज्या वेळार भारतीय जनता पक्षाचे चार आमदार वेंचून आयिल्ले तातूंत हांवूय आशिल्लों. हांव भारतीय जनता पक्षांत दुसरे सुवातेर आशिल्लों. आपलो ट्रेक रेकॉर्ड लोकांक खबर आसा. हांवें जातपात पळयनसतना लोकांचीं कामां केल्यांत. मडगांवकारांनी म्हाका पक्ष पळय नसतना दिगंबर कामत म्हूण सदांच वेंचून दिला अशें मडगांवचे आमदार दिगंबर कामत हांणी सांगलें.

काॅंग्रेस पक्ष सोडटना दुख्ख जालें. ज्या वेळार 10 आमदार काॅंग्रेस पक्ष सोडून भारतीय जनता पक्षांत गेल्ले त्या वेळार आपूण काॅंग्रेसी बराबर रावलों. फाटले वेंचणुकेंत 11 आमदार जिखून आयले तातूंत चड योगदान म्हजेंच आशिल्लें. जर आपूण नाशिल्लों जाल्यार पांच आमदार लेगीत जिखून येवचे नाशिल्ले अशें कामत हांणी सांगलें.

काॅंग्रेस पक्षान विरोधी पक्ष फुडारी पद दिलें ना. पक्षान आपल्याक म्हत्व दिलें ना. फाटलीं धा वर्सां विरोधी पक्षांत आसा, पूण कार्यकर्ते कोणूच पक्ष सोडून गेले नात. कार्यकर्त्यांनी सांगलें, जो निर्णय तूं घेता तो आमकां मान्य आसतलो अशें दिगंबर कामत हांणी सांगलें.

सुरवातेक आपणें नागेशी महालक्ष्मी देवळांत प्रसाद घेतलो. पणजे महालक्ष्मी देवळांत गाराणें घालें. देवीन सांगलें कार्यकर्ते जे सांगतात ताचेर निर्णय घे. आपलो देवाचेर विस्वास आसा. देवाच्या भक्तीचेर कोणे लेक्चर दिवपाची गरज ना. हांवें महालक्ष्मी, देव नागेश आनी जांबावले दामोदराच्या देवळांत प्रसाद घेतलो. प्रसादाचेर म्हजो पूर्ण विश्वास आसा. ते प्रमाण आपल्याक येस मेळ्ळें आनी बुधवारा भारतीय जनता पक्षांत रितसर प्रवेश केलो.

प्रधानमंत्री नरेंद्र मोदी देशाची उदरगत करतात, करपाक सोदतात. आंतरराष्ट्रीय पांवड्यार भारतीय लोकांचो सन्मान वाडला. विमानतळार खंयच्याय भारतीय मनशाक कोणूच आडायनात. भारतीय म्हणले उपरांत येवकार दितात अशें ताणी सांगलें.

मुख्यमंत्री डॉ. प्रमोद सावंत गोंयच्या विकासा खातीर काम करतात .विकासाचे बाबतींत गोंय फाटल्यान उरपाक जायना अशें आपल्याक दिसता. पक्षाच्या सगल्या फुडाऱ्यां म्हजे लागींचे बरे संबद आसात. आपल्याक पदाची कसलीच अपेक्षा ना. तुमी त्या वेळार पक्षांत दुसऱ्या नंबराचेर आशिल्ले तेन्ना भाजपा पक्ष सोडिल्लो अशें विचारलें तेन्ना तें कारण वेगळें आशिल्लें. आपूण भुतकाळ आनी भविश्यकाळाचेर विश्वास दवरना. वर्तमान काळ पळयता. ज्या वेळार पुस्तक बरयतलों त्या वेळार तें कारण बरयतलों अशें ताणी सांगलें.

मडगांवां दामबाबाच्या थळांत गर्व, अहंकार चलना. आपले पांय जमनीर आसात अशें तांणी सांगलें.

ह्या वेळार कार्यकर्त्यांनी ‘भारतीय जनता पक्षाचा विजय असो’, ‘दिगंबर कामत तुम आगे बढो हम तुम्हारे साथ हैं!’ अशो घोशणा दिल्यो. सुमार शेंकड्यांनी समर्थक दिगंबर कामत हांच्या घरा मुखार येवकार दिवपाक जमिल्ले.