भांगरभूंय | प्रतिनिधी
वास्को, प्रतिनिधी: भौशीक बांधकाम खात्याच्या मजूर पुरवण संस्थेच्या विभाग क्रमांक २१ च्या कामगारांक अजून म्हारगाय भत्तो तशेंच बोनसची रक्कम दिवंक नाशिल्ल्यान त्या कामगारांनी तिडक उक्तायल्या. हेर सगळ्या विभागांच्या कामगारांक ही रक्कम चवथी पयलीं दिल्या. पूण आमचे विशीं पक्षपातीपणा कित्याक? असो प्रस्न विचारला.
ह्या कामगारांक भौशीक बांदकाम खात्याच्या मंजूर पुरवण संस्थेंत २०२० त आस्पावन घेतिल्ले. तांकां सगळे तरेचो लाव मेळटा. चवथी पयलीं हेर विभागांतल्या सगळ्या कामगारांक म्हारगाय भत्तो तशेंच बोनस दिलो. ताका लागून विभाग क्रमांक २१ चे कामगार तांकां ही रक्कम मेळटली हे आशेर आसात. पूण तांच्या पदरांत निर्शेवणीच आयल्या.
तांच्या मतान परिवर्तनीय म्हारगाय भत्तो ११६३ आनी बोनस १००० हजार रुपया चवथी पयलीं मेळिल्लो जाल्यार चवथ उमेदीन वचपाची. पूण संबंदीतांनी आजूनय बिलां तयार करूंक नाशिल्ल्याचें कळून येता. हे विशीं तांची एका आमदाराची भेट घेवन तांचे मुखार प्रस्न मांडिल्लो. त्या आमदारान रोखडीच दखल घेवन कार्यकारी अभियंत्या कडेन संपर्क सादलो. त्या कार्यकारी अभियंत्यान ही रक्कम चवथी पयलीं दिवपाचें आस्वासन दिल्लें. पूण त्या आस्वासनाची अमलबजावणी जावंक ना.
ही रक्कम केन्ना हातांत येतली हाचे कडेन संबंदी कामगारांचें लक्ष तिगून आसा. वरिश्ठांनी हे विशीं दखल घेवपाची गरज तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
