भांगरभूंय | प्रतिनिधी
15 ऑक्टोबराक जाहीर बसका
पणजी : रस्त्याच्या विस्तारीकरणा आड आयज भोमकारांनी थंयच्या राखणदाराक गाराणें घालें. सरकार आमचे वटेन ना, हें सिद्ध जालां. दिल्लीच्यान येवपी सुचोवण्या प्रमाण तें वागपाक लागलां. देखून आतां आामी आंदोलन आनीक खर करतले. 15 ऑक्टोबराक जाहीर बसका घेवपाचें थारायलां. हांगा रस्त्याचें विस्तारीकरण जावपाक दिवचे नात, हे मागणेचेर आमी आजून ठाम आसात, अशें भोमकारांनी आयज पत्रकारांक सांगलें.
हांगा रावपी लोक फाटल्या कितल्याशाच दिसां सावन हांगच्यान वचपी राष्ट्रीय म्हामार्ग रुंद करपाक विरोध करतात. ह्या रस्त्याक लागून कांय घरां वतलीं, देवळाकूय धोको निर्माण जाला. आमचे फुडारी फक्त गोड- गोड आस्वासनां दितात. आमी बगल रस्त्याची मागणी केल्या. तरी लेगीत बांदकाम खात्या वतीन रस्त्याचें रुंदीकरण करपाचे यत्न चालूच आसा. जमीन सरकारान अधिसुचोवणे वरवीं ताब्यांतूय घेतल्या. शक्य आसतना सरकार वयल्यान बगल रस्तो कित्याक करीना, तें कळना. आतां आमी 15 ऑक्टोबराक जाहीर बसका घेवपाचे थारायलां. उपरांत फुडल्या आंदोलना विशीं निर्णय घेतले, अशें कांय तरणाट्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
