भांगरभूंय | प्रतिनिधी
दोनूय मार्ग सुरू दवरचे: युरी आलेमांव
मडगांव: चांदरा फाटलीं कितलीशींच वर्सां सुरू आशिल्लो रेल्वे दरवटो 1 मे सावन कायमचो बंद करपाचो निर्णय दक्षीण, अस्तंत रेल्वेच्या प्रशासना कडल्यान घेतला. हे विशीं जाहीर नोटीस काडल्या. विरोधी पक्षा फुडारी तशेंच कुंकळ्ळीचे आमदार युरी आलेमांव हांणी ह्या निर्णयाक आक्षेप घेवन लोकांची गैरसोय जावपाची आशिल्ल्यान भुंयगत मार्गा सयत रेल्वेचो दरवटो सुरू दवरपाची मागणी केल्या.
चांदरा मनीस नियंत्रीत लेव्हल क्रॉसींग कोंकण रेल्वेचें काम केलां तेन्ना सावन सुरू आसा. फाटल्या वर्सा दक्षीण अस्तंत रेल्वे मार्गा वयल्या चांदर हांगासरल्या रेल्वे दरवट्या कुशीक भुंयगत मार्गाचें काम पुराय केलां आनी हो भुंयगत मार्ग वाहनां खातीर उक्तो केला. ह्या कारणा खातीर आतां चांदरा फाटलीं कितलींशींच वर्सां सुरू आशिल्लो मनीस नियंत्रीत रेल्वे दरवटो कायमचो बंद करपाचो निर्णय दक्षीण अस्तंत रेल्वे प्रशासना कडल्यान घेतला.
हे विशींची रेल्वे प्रशासना कडल्यान जाहीर नोटीस काडून चांदर चर्च सर्कल ते गिरदोळी जंक्शनाक जोडपी मार्गा वयल्या रेल्वेचें मनीस नियंत्रीत जंक्शनाक जोडपी मार्गा वयल्या रेल्वेचें मनीस नियंत्रीत रेल्वेचो दरवटो क्रमांक 18 हो 1 मे 2023 सावन कायमचो बंद करतले अशें सांगलां. रेल्वे लेव्हल क्रॉसींग बंद करचे पयलीं भुंयगत मार्गा सयत एक रेल्वे ओव्हर ब्रिजाची निर्मिती करून तो येरादारी खातीर उक्तें केल्ल्याची म्हायती दिल्या.
दक्षीण अस्तंत रेल्वे प्रशासना कडल्यान चांदरा रेल्वे क्रॉसींग बंद करपाचे नोटिसी उपरांत कुंकळ्ळीचे आमदार तशेंच विरोधी पक्ष फुडारी युरी आलेमांव हांणी ह्या निर्णयाचेर आक्षेप घेतला. ह्या रेल्वे क्रॉसींग रस्त्या वयल्यान चांदरा चर्चींत वचपी भावीक, विद्यार्थी, बाजारा खातीर वचपी लोक आनी गिरदोलीच्या थळाव्या लोकांक येवपा-वचपा खातीर गैरसोय जातली. तांची येरादारी सोयिस्कर जावपा खातीर भुंयगत मार्गा सयत रेल्वेचो दरवटो अशे दोनूय मार्ग सुरू दवरपाची गरज आसा अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
