भांगरभूंय | प्रतिनिधी
पणजी, प्रतिनिधी ः गोंय राज्य दिव्यांग व्यक्तींच्या कार्यालयान सर्वसमावेशकता वाडोवपा खातीर आनी शाळेंतल्या भुरग्यांक संवेदनशील करपा खातीर घेतिल्ल्या म्हत्वाच्या पावलांची गोंय माध्यमीक आनी उच्च माध्यमीक शिक्षण मंडळान तोखणाय केल्या. राज्यभरांतल्या उच्च माध्यमीक शाळांनी भारतीय सांकेतिक भास (आयएसएल, कुरवांची भाशा) हो सातवो पर्यायी विशय म्हूण सुरू करपाचें थारायलां. विद्यार्थ्यां मदीं सहानुभूती, समजूत आनी संवाद हांचे आडमेळीं पयस करपाचो हाचे फाटलो हेतू आसा.
शिक्षणीक वर्स 2024- 25 लागीं पावतकच राज्यांतल्या 30 परस चड शाळांनी भारतीय सांकेतिक भास (आयएसएल) पर्यायी विशय म्हूण घेवपाचो निर्णय घेतला. आनी ह्या उपक्रमाची येसस्वी अंमलबजावणी सुनिश्चीत करपा खातीर हालींच गोंय असोसिएशन फॉर द डेफ हे संस्थेन आयोजीत केल्ल्या भारतीय सांकेतिक भाशेचेर अभिमुखीकरण कार्यशाळेंत पन्नास शिक्षकांनी वांटो घेतलो. सर्टिफइड डेफ् आयएसएल प्रशिक्षक राहुल कुंकळ्ळीकर आनी सुजाता पासी, सर्टिफाइड आयएसएल दुभाषी जोसेफीना फर्नांडीस आनी मुस्कान शेख, आनी डेफ् तज्ञ प्रसाद जोशी आनी शर्वरी पणशीकार हांणी आयएसएल अभ्यासक्रमाची उदरगत करपा विशीं मार्गदर्शन केलें.
भारतीय सांकेतिक भास (आयएसएल) अभ्यासक्रम जानेवारी 2024 मेरेन निमाणो जातलो. 2024-25 शिक्षणीक वर्सा सावन णवी वर्गा खातीर सातवो पर्यायी विशय म्हणून ताची सुरवात जातली, उपरांत धाव्या वर्गांत ह्या विशयाची वळख करुन दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
