भारतीय भाशांची प्रतारणा करपी निर्णय फाटीं घेतलो ना जाल्यार खर आंदोलन भारतीय भाशा सुरक्षा मंचाचो निर्णयः  शालांत मंडळाक म्हयन्याची मुजत 

भाभासुंमच्या येरें समितीचे बसकेंत उलयतना प्रा सुभाष वेलिंगकार

भांगरभूंय | प्रतिनिधी

भांगरभूंय । खबरां मेज
पणजीः नवें शिक्षणीक धोरण लागू करतना त्रिभाशा आनी द्विभाशा सूत्राचें उच्चाटन करून उच्च माध्यमीक पावंड्यार इंग्लिश ही भाश तिगोवन दवोरून कोंकणी, मराठी, संस्कृत आनी हेर देशी भाशांचें घट्टन करपाचो निर्णय गोंय माध्यमीक आनी उच्च माध्यमीक शिक्षण मंडळान घेतला अशी खबर आसा. भारतीय भाशा सुरक्षा मंचाचे येरें समितीचे बसकेंत शालांत मंडळाच्या ह्या कारस्थानी निर्णयचो  निशेध करून व्हो निर्णय फाटीं घेवपाक एक म्हयन्याची मुजत दिल्या. व्हो निर्णय फाटीं घेतलो ना जाल्यार खर आंदोलन करपाची शिटकावणी मंचान दिल्या.
नवें शिक्षणीक धोरण  जाय ती पूर्व तयारी करनास्तना लागून करपाच्यो गजाली गोंय सरकार करता. माध्यमीक आनी उच्च माध्यमीक पावंड्यार आतां मेरेन आशिल्ले त्रिभाश आनी द्विभास सूत्र कुशीक दवोरून इंग्लिशीचो फांखो घेवपाचें धोरण शिक्षण मंडळ फुडें व्हरपाक सोदता. कोंकणी- मराठी ह्या गोंयच्या मायभासां वांगडा हेर भारतीय भासांचे उच्चाटण करपाच्या शालांत मंडळाच्या कारस्थानी निर्णयाचो बसकेंत निशेध केलो
भारतीय संस्कृती, परपंरा आनी दायज हे विशीं विद्यार्थ्यां मदीं अभिमान आनी गौरवाची भावना तयार जावची हे खातीर मायभास आनी भारतीय भाशांचेर भर दिवप हे नव्या शिक्षणीक धोरण्याच्या मुखेल उद्दिश्टांतलें एक उद्दिश्ट आसतना गोंयांत मात मायभाशांचें खच्चीकरणाक कारण आशिल्ल्या विदेशी इंग्रजी माध्यमाच्या शाळांक सरकारी अनुदान दिवप चालू दवोरप ही विसंगत बाब आसा. नव्या शिक्षणीक धोरणाच्या मूळ हेता कडेन प्रतारण करून ही जी परस्पर विरोधी आनी विपरीत भूमिका गोंयच्या भाजप सरकारान घेतल्या ताचो भाभासुमंना निशेध केला. अशी म्हायती मंचाचे राज्य निमंत्रक प्रा. सुभाष वेलिंगकार हांणे दिली.
 शिक्षणीक धोरणा कडेन विसंगत भूमिका गोंय सरकारा कायम दवोरता काय नव्या धोरणा कडेन प्रामाणीक रावपा खातीर ती सोडटा हाचे कडेन भाभासुमंचें लक्ष आसतलें. जुलय म्हयन्या सावन नव्या शिक्षणीक धोरणाची कार्यवाही करपाचें सरकारन जाहीर केलां. जुलय म्हयन्यांत प्राथमीक पावंड्यार इंग्रजीचें अनुदान बंद करून मुळाव्या पांवड्यार फकत मराठी- कोंकणी हेच मायभास माध्यम करपाची अधिकृत घोशणा सरकारान केली ना जाल्यार लोक जाग्रुताये खातीर आंदोलन केल्या बगर दुसरो पर्याय भाभासुमं सामकार आसचो ना. ह्या आंदोलनाक मायभाश खच्चीकरणाक कारण आसपी गोंय भाजप सरकार जापसालदार आसतलें अशें मंचान म्हणलां.
आदलो मुख्यमंत्री लक्ष्मीकांत पार्सेकार हाणे मराठी कोंकणी प्राथमीक शाळां खातीर दरेका विद्यार्थ्याक दर म्हयन्याक 400 रुपयांचें विशेश अनुदान सावंत सरकारान तीन वर्सा सावन बंद करून मराठी- कोंकणी शाळांचे तिगप कुस्तार करून सोडलां. बिगर वेतन अनुदान येवजण पर्याय म्हणून लागू करपाची घोशणा सरकारान केल्ली. ते येवजणेचो तपशील आयल्या उपरांत मंच ताचेर आपली भूमिका आनी प्रतिक्रिया दितलो अशें वेलिंगकार हांणे सांगलें.
मंचाचे येरें समितीचे बसकेक प्रा. प्रवीण नेसवणकार, फादर मौझिन आताईदस, संदीप पाळणी, नितीन फळदेसाय, सूर्यकांत गांवस, अभय सामंत, सुरेश डिचोलकार, मनोहर पेडणेकार, अभय खवंटे, गावडे हाजीर आशिल्ले. मुख्यमंत्री डॉ प्रमोद सावंत हाची भेट घेवंन ताकां एक निवेदन दिवपाचो निर्णय घेतला. शिक्षणीक धोरणा संबंदी गजर पडल्यार न्यायालयांत दाद मागपा खातीर वकिली सल्लोय घेवपाचें बसकेंत थारलें.