भांगरभूंय | प्रतिनिधी
म्हापशें अबकारी खात्याचें 12 लाख भाडें देणें; इमारत धनयाची कारवाय
म्हापशें: अबकारी कचेरी आशिल्ली कॉस्मॉस सेंटर ह्या खाजगी इमारतीची लिफ्ट बंद आसा. अबकारी खात्यान हे कचेरेचें म्हयन्याचें भाडें 12 लाख रुपया दिवपाचें आशिल्ल्यान इमारतीच्या धनयान लिफ्टूच बंद दवरल्या. हाका लागून वेवसायिकांनी निरशेणी उक्तावन ही लिफ्ट परतून सुरू करची अशी मागणी केल्या.
मेळिल्ले म्हायती प्रमाण, मरड म्हापश्यां कॉस्मॉस सेंटर ह्या इमारतीच्या पांचव्या माळ्यार अबकारी खात्याच्या निरिक्षकांची कचेरी आसा. बार्देस म्हालांतले रॅस्टोरंण्ट, बार आनी व्हायन स्टोराचे धनी गरजेचे परवाने मेळोवपा खातीर वयले कचेरेंत येतात.
सद्या अर्थीक वर्साचे निमाणे दीस आशिल्ल्यान व्हड प्रमाणांत वेवसायिकांचें येवप-वचप हे कचेरेंत आसा. पूण इमारतीची लिफ्टूच बंद दवरिल्ल्यान ह्या लोकांक पांचव्या माळ्यार चडपा खातीर 100 सोंपणा चडचीं पडटात.
फाटल्या तीन म्हयन्यां सावन ही लिफ्ट बंद आसा. अबकारी खात्यान कचेरेच्या भाड्याचें 12 लाख रुपया दिवंक नाशिल्ल्याच्या कारणा खातीर इमारतीच्या धनयान ही लिफ्ट बंद दवरल्या. फाटल्या वर्सा जून म्हयन्यांत अशीच लिफ्ट बंद दवरिल्ली. पूण उपरांत ऑगस्टांत ती सुरू केल्ली.
मद्य वेवसायिकांक गरजेच्या कामा खातीर ह्या इमारतीच्या पांचव्या माळ्या मेरेन चलत वच्चें पडटा. जाणट्या मनशांक हे कचेरेंत वचपा खातीर बरीच सर्कस करची पडटा.
वेवसायीक बलभीम मालवणकार, सोनू दाभोलकार आनी हेरांनी ह्या बंद अवस्थेंत आशिल्ले लिफ्टीक लागून निरशेणी उक्तायली. तीन म्हयन्यां परस चड काळ ही लिफ्ट बंद आसा. ताका लागून वेवसायिकां सयत कचेरेंतल्या कर्मचारी वर्गाची गैरसोय जाता. आपल्या परवान्यांचें नुतनीकरण करून घेवपा खातीर पांच माळे चडचें पडटात अशें तांणी सांगलें.
खात्यान कचेरेचें भाडें भरूंक नाशिल्ल्यान ही समस्या उप्रासल्या. सरकारान ताकतिकेन हाचेर उपाय काडून वेवसायिकां मुखा वयली समस्या पयस करची अशी मागणी मालवणकार हांणी केली.
सरकारी नवे प्रक्रिये प्रमाण सरकारचे मान्यताये खातीर ह्या कचेरेचे भाडेकार कबलातीपत्राचे नुतनीकरण प्रलंबीत आसा. बार्देसांत तीन हजार परस चड परवानोधारक वेवसायीक आसात. मार्च म्हयनो हो सोरो विक्री परवान्याचो नुतनीकरणाची काळ. ताका लागून वेवसायिकांक हे कचेरेंत फावटी मारच्यो पडत आसून ही बंद लिफ्ट केन्ना सुरू जातली हाची वाट वेवसायीक पळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
