भांगरभूंय | प्रतिनिधी
बोणबाग, बेतोड्यां बुधवारा रातीं 10.30 वरांच्या सुमाराक मोटार देगणांत पडून तीग जाण जखमी जाले. अपघाताची म्हायती मेळटकूच थळाव्यांनी जखमींक भायर काडून उपचारा खातीर फोंडेंच्या उपजिल्हो हॉस्पिटलांत दाखल केले. जखमी मदीं प्रेमसिंह राठोड, ललिता राठोड आनी कौशीक राठोड हांचो आस्पाव आसा.
मेळिल्ले म्हायती प्रमाण बेळगांव सावन रातीं मोटार घेवन राठोड कुटुंब मडगांवां वतालें. त्या वेळार मोटार चालकाक अचकीत न्हीद आयिल्ल्यान मोटार सरळ 30 मिटर खोल देगणांत पडली. हे मोटारींत आशिल्ले तिगूय जाण जखमी जाले. जखमींक 108 अॅम्बुलन्सींतल्यान फोंडेंच्या उपजिल्हो हॉस्पिटलांत व्हेले. उपरांत अदीक उपचारा खातीर तांकां गोमॅकाँत धाडून दिले.
पुलिसांनी दिल्ले म्हायती प्रमाण सगल्या जखमींचेर उपचार करून घरा धाडून दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
