भांगरभूंय | प्रतिनिधी
वास्को: चिकोळणें-बोगमाळो पंचायत वाठारांत पर्यटनाक चालना दिवपा खातीर रोखडेच बोगमाळो तळ्यांत बोटींग सुरू करतले. चिखली पंचायत वाठारांतल्या जॉगर्स पार्काच्या नुतनीकरण आनी दुसऱ्या टप्प्याचें काम पुराय जाल्ल्यान रोखडेंच ताचें उक्तावण करतले अशें पंचायत मंत्री आनी दाबोळीचे आमदार मॉवीन गुदिन्हो हांणी सांगलें.
बोगमाळो दर्यादेगेर नव्या राखणे वणटीचें तशेंच सोबितीकरणाचें उक्तावण मंत्री गुदिन्हो हांचे हस्तुकीं जालें. ह्या वेळार पंचायत खात्याचे उपसंचालक प्रसिध्द नायक, मुरगांवचे गटविकास अधिकारी प्रितेश शेट्ये, बोगमाळोचे सरपंच संकल्प महाले, उपसरपंच लोरेना कुन्हा, चिखलीचे सरपंच कमलाप्रसाद यादव, बोगमाळोचे पंच आनी हेर मानेस्त हाजीर आशिल्ले. राखणे वणत बांदतना लोकांक बसपा खातीर बांकांची वेवस्था केल्या.
बोगमाळो सारक्या सुंदर आनी शांत गांवांत पर्यटनाक चालना दिवपा खातीर आमचे यत्न सुरू आसात. हो वाठार चडांत चड सोबीत करपा खातीर थंयच्या नखेत्री हॉटेल वेवसायिकांची मजत घेतले अशें गुदिन्होन सांगलें.
बोगमाळो प्रमाणूच चिखली पंचायतीचीं विवीध कामां चालीक लागत आसात. तातूंत जॉगर्स पार्काच्या दुसऱ्या टप्प्याचें काम पुराय जायत आयलां. नवो घाण उदक प्रक्रिया प्रकल्प, नवो कोयर प्रक्रिया प्रकल्प आनी हेर प्रकल्प चालीक लागतले. ताका लागून पुराय दाबोळी मतदारसंघांतल्या लोकांक चडांत चड सुविधा मेळपाक मजत जातली अशें तांणी म्हणलें.
प्रसिद्ध नायक हांणी सांगलें, लोरेना कुन्हा हांच्या कार्यकाळांत ही राखणे वणत कोसळ्ळे उपरांत तांणी सेगीत फाटपुरवण करून नवी राखणे वणत बांदपा खातीर यत्न केल्ले. पंचायत मंत्री गुदिन्हो हांच्या सहकार्याक लागून हे पंचायतींत चडांत चड विकास कामां जायत आसात.
सरपंच महाले हांणी चिकोळणें-बोगमाळो पंचायतीक मंत्री गुदिन्हो हांचे सेगीत सहकार्य मेळत आशिल्ल्याचें सांगलें. तांच्या सहकार्यान ह्या पंचायतींत चडांत चड विकास कामां चालीक लागत आशिल्ल्याचें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
