भांगरभूंय | प्रतिनिधी
शिमेपायण-मंगेशी वाठारांतली दुसरी घडणूक
फोंडें: शिमेपायण-मंगेशी हांगासरल्या रस्त्याचे कुशीक आशिल्ले एके बाबगायतींत मंगळारा सकाळीं फांसांत आडकून बिबट्याक मरण आयिल्ल्याचें लोकांक दिसून आयलें. फाटल्या कांय दिसां सावन बिबट्यान वाठारांतल्या सुण्यांक लक्ष्य करून खवदळ घाल्लो. पोरूं ह्याच वाठारांत आनीक एका बिबट्याक फांसांत आडकून मरण आयिल्लें. उपरांत एका वर्सान परतून दुसऱ्या बिबट्याक फांसांत आडकून मरण येवपाची घडणूक घडली.
शिमेपायण-मंगेशी आनी मडकय वाठारांत फाटल्या कांय दिसां सावन खवदळ घाल्ल्या बिबट्याक फांसांत आडकून मरण येवपाची घडणूक घडली. मंगळारा सकाळीं हो प्रकार उक्तडार आयले उपरांत रान खात्याच्या अधिकाऱ्यांक म्हायती दिली. रान खात्याचे अधिकारी दीपक तांडेल आनी हेर कर्मचाऱ्यांनी पंचनामो केलो. उपरांत कुडीची फुडली तपासणी केली. दोतोरांचो अहवाल मेळ्ळे उपरांत बिबट्याच्या मरणाचें कारण स्पश्ट जातलें.
फाटल्या कांय दिसां सावन बिबट्यान वाठारांतली खूबशीं सुणीं उबारून व्हेल्लीं. तशेंच कुंडय-मडकय रस्त्या वेल्यान वचपी एका दुचाकी चालकाचो बिबट्यान सांजवेळाच्या वेळार फाटलाग केल्लो. ताका लागून वाठारांत भिरांत पातळिल्ली. मंगळारा सकाळीं बिबटो फांसांत आडकून ताका मरण आयलें. फांस लावपा खातीर अनवळखी मनशांनी नव्या केबलाचो वापर केल्ल्याचें तपासणींत दिसून आयलें. रान खात्याचे अधिकारी हे संबंदी गंभीरतायेन अदीक चवकशी करतात. कारण वाठारांत दोन वर्सांत दोन बिबट्यांक फांसांत आडकून मरण येवपाची घडणूक घडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
