भांगरभूंय | प्रतिनिधी
भारतीय नौदळान शॉर्ट सर्व्हिस कमिशन अधिकार्यांक प्रवेश दिवपा खातीर अधिसुचोवणी जारी केल्या. ह्या पदाचेर भरती करपा खातीर अर्ज करपाची प्रक्रिया ७ ऑक्टोबर सावन सुरू जाल्या. वट्ट २२४ कार्यकारी शिक्षण आनी तंत्रीक पदां भरतले. उमेदवारांक २९ ऑक्टोबर मेरेन अर्ज करपाक मेळटले.
उमेदवार joinindianavy.gov.in हे अधिकृत वेबसायटीक भेट दिवन नोंदणी करपाक शकतात. ह्या पदांचेर अर्ज करपाक पात्रताय, निवड प्रक्रिया आनी पिरायेची मर्यादा आसा. अर्ज भरपा खातीर कसलेच तरेची फी भरची पडची ना. नोंदणी फुकट आसा.
सामान्य सेवे (जीएस) खातीर ४० पदां थारायल्यांत. दादले आनी बायलो दोनूय उमेदवार अर्ज करपाक शकतात. हवाई येरादारी नियंत्रणा खातीर (एटीसी) ८ पदां रितीं आसात. नौदळ हवाई अधिकार्यां खातीर (एनएओओ) १८ पदां थारायल्यांत. पायलटां खातीर २० आनी लॉजिस्टिका खातीर २० पदां थारायल्यांत. नौदळ शिक्षण फांट्यांत वट्ट २६ पदां भरपाचीं आसात. तशेंच भारतीय नौदळाच्या तंत्रीक फांट्यांत दादले आनी बायलां खातीर वट्ट १०० पदां हे रिते आशिल्ले सुवातेर भरतले.
भारतीय नौदळ भरती अधिसुचोवणी २०२४ ह्या लिंकाचेर पळयात
ह्या पदाचेर अर्ज करपा खातीर उमेदवारांक ६० टक्के गुणां सयत बी. टॅक पदवी आसप गरजेचें. संबंदीत वेपारी गिन्यान आसूंक जाय. तशेंच एमसीए, बीकॉम. बी.एससी, एमसीए धारक आसूंक जाय. उमेदवारांक १० वी आनी १२ वेंत इंग्लीशींत ६०% गूण आसपाक जाय. उमेदवारांचो जल्म २ जुलय १९९९ पयलीं आनी १ जानेवारी २००५ उपरांत जाल्लो आसूंक फावना. एटीसीचे खातीर उमेदवारांचो जल्म १ जुलय २००३ उपरांत जाल्लो आसचो न्हय.
अशे तरेन अर्ज करात
अर्ज करपा पयलीं joinindianavy.gov.in हे वेबसायटीचेर वचात.
वेबसायटीचेर अर्ज करचे पयलीं, अधिकृत अधिसुचवण्यो वाचात.
अर्जा कडेन संबंदीत सगळीं गरजेचीं कागदपत्रां, सय, फोटो, आयडी प्रूफ अपलोड करात.
उपरांत, सबमीट केल्ल्या अर्जाची प्रिंट काडात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
