भांगरभूंय | प्रतिनिधी
-नव्या बालरथांचो प्रस्ताव सध्या विचारांत नाः मुख्यमंत्री
पणजी : बालरथा खातीर 23 अर्ज आयिल्ल्याचे लेखी जापेंत स्पश्ट राज्यांतल्या कांय शाळां मदल्या विद्यार्थ्यांक येरादारीची समस्या उपासल्या. अशा विद्यालयां कडल्यान बालरथां खातीर शिक्षण खात्या कडेन 23 अर्ज आयल्यात. पूण खंयच्याच शाळांक नवे बालरथ दिवपा विशींचो कसलोच प्रस्ताव सध्या सरकाराच्या विचारांत ना, अशी जाप मुख्यमंत्री डॉ. प्रमोद सावंत हांणी विधानसभेंतल्या एका लेखी प्रस्नाक दिल्या.
आमदार विरेश बोरकार हांणी हे विशींचो प्रस्न विचारिल्लो. बालरथ नाशिल्ल्यान कांय वाठारांतलीं विद्यालयां तशेंच उच्च माध्यमीक विद्यालयांच्या विद्यार्थ्यां मुखार व्हड प्रस्न निर्माण जाला. अशा प्रकारच्यो कागाळी शिक्षण खात्या कडेन आयल्यात?, तांकां नवे बालरथ दिवपाचो विचार सरकारान केला?, अशें प्रस्न आमदार बोरकार हांणी विचारिल्ले. त्याचेर कांय शाळांतल्या विद्यार्थ्यांक येरादारीची समस्या आशिल्ल्याचे मुख्यमंत्र्यांनी मान्य केले. बालरथा खातीर 23 अर्ज आयल्यात. तांणी नवे तशेंच अतिरिक्त बालरथ दिवपाची, बालरथ बदलून दिवपाची तशेंच कंदंबा बशीची वेवस्था करपाची मागणी केल्या. पूण खंयच्याच शाळांक नवे बालरथ दिवपा विशीं सरकारान सध्या कसलोच विचार करूंक ना. तसो प्रस्ताव सरकारा मुखार ना, अशें मुख्यमंत्री डॉ. सावंत हांणी म्हणलें.
सध्या सरकारी विद्यालया, उच्च माध्यमीक विद्यालया तशेंच विशेश भुरग्यांच्या शाळा खातीर 413 बालरथ दिल्यात. तशेंच कदंबा म्हामंडळाच्या 200 बशींनी विद्यार्थ्यांची येरादारी चलता, अशेंय तांणी नमूद केले.
खंयच्या म्हालांत कितले बालरथ?
पेडणें : 38
बार्देस : 69
दिवचल : 26
सत्तरी : 11
तिसवाडी : 55
फोंडें : 56
सांगें : 18
केपें : 28
काणकोण : 19
साश्ट : 72
मुरगांव : 21
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
