भांगरभूंय | प्रतिनिधी
पणजीः 18 जून गोंय क्रांती दिसा निमतान बार्देस कोंकणी अस्मिताय केंद्र, म्हापशें आयोजीत केल्ले कार्यावळींत मुखेल सोयरे तशेंच गोवा कोंकणी अकादेमीचे अध्यक्ष अरुण साखरदांडे हांणी केंद्राचे जाळवणदार आनी हेर वांगड्यांच्या सांगातान म्हापशेंच्या हुतात्मा स्मारकाचेर फुलांहार ओंपून अभिवादन केलें.
फुडली कार्यावळ सत्यहिरा बसका घरांत जाली. केंद्राची अध्यक्षा कुसूम अग्रवाल हांणी येवकाराचें उलोवप केलें. मुखेल सोयऱ्यांनी दिवली पेटोवन डॉ. लोहिया हांचे प्रतिमेक फुलांहार ओंपलो. ह्या वेळार कोंकणी केंद्राचे जेश्ठ कार्यकर्ते प्रा. सुभाष नायक तशेंच प्रा. रविंद्र फोगेरी हाजीर आशिल्ले.
मुखेल सोयऱ्यांची वळख केंद्राचो वांगडी अद्वैत साळगांवकर हांणे केली. केंद्राच्यो भांडारी नूतन साखरदांडे हांणी मुखेल सोयऱ्यांक यादस्तीक भेटयलें आनी 18 जूनाचेर कवीवर्य मनोहर राय सरदेसाय हांची कविता सादर केली.
गोंयाक पुर्तुगेज राजवटींतल्यान मुक्त करपा खातीर सुटके झुजारी आनी हुतात्म्यांनी केल्ल्या बलिदानाचो उगडास मुखेल सोयऱ्यांनी करून दिलो. कार्यावळीचें सुत्रसंचालन केंद्राची जोडसचीव आनी संयोजक प्रविणा थळी हांणी केलें. जाल्यार केंद्राची सचीव सोनाली चोडणकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
