बायलांनी आपल्यो भावना उक्तावच्यो, मौन आपणायल्यार भलायकेक धोको

भांगरभूंय | प्रतिनिधी

तुमी दोतोरा कडेन वा मानसोपचार तज्ञा कडेन वतात आनी ते तुमकां, बेजार जायात, तुमच्या लागींच्या लोकांचेर राग काडात असो सल्लो दिल्यार तुमकां कशें दिसतलें? तुमच्या मनांत अशें आसतलें उपचारा खातीर फकत दोतोराची गरज आसा म्हणून. पूण तशें ना. अमेरिकन मानसशास्त्रज्ञ आयल मॅटेल म्हणटा, ‘हांव दुयेंतींक असोच सल्लो दितां. तांतलीं चडशीं बायलां आसतात. पूण हें सांगतना तांकां अजाप जाता आनी तीं सहजपणान आपलीं मतां उक्तावपाक तयार जायनात.

खरें म्हणल्यार चलयांक सुरवातेक सावन खोशी दिसप, त्याग करप, भावनांचेर नियंत्रण दवरप आनी शांत रावप हें शिकयतात. मागीर तांकां ते आदर्श दिसता. पूण तांच्या मनांत जायते प्रस्न आसतात. बायलांचें हें मौन तांकां दुयेंत करून उडयता अशें आयल मॅटेल म्हणटात. तांचें दुख्ख वाडत आसा आनी तांचें जिवीत उणें जायत आसा. ८० च्या दशकांत हार्वर्डाचे मानसशास्त्रज्ञ दाना जॅकान डिप्रेशन पिडेस्त आशिल्ल्या बायलां मदीं एक सामान्य गजाल पळयली… ती म्हणल्यार ‘ओगी रावपाची प्रवृत्ती.’ आयज लेगीत परिस्थिती तशीच आसा.

स्वत:च्यो रोगप्रतिकारक यंत्रणेंतल्यो समस्या म्हळ्यार स्वयंप्रतिकार रोगांची ८०% प्रकरणां बायलां मदीं असतात. तांकां न्हीद येवप आनी माइग्रेन जावपाची चड शक्यताय आसता. काळजाचो आताक आयल्या उपरांत दादल्यांक मरण येवपाची शक्यताय दुप्पट आसता. बायलांच्या रोगांचीं कारणां फकत आनुवंशिक वा हार्मोनल न्हय तर मानसोपचारीकय आसतात. पिट्सबर्ग विद्यापिठाच्या संशोधनांतल्यान दिसून येता की ज्या बायलांक आपल्या प्रिय व्यक्तींचो राग येना तांकां काळजाच्या दुयेंसांचो धोको ७०% वाडटा. हातूंत बदल करपाक ‘न्यू नॉर्मल’ जाय अशें जाणकार म्हणटात. हातूंत बायलो भावना आनी गरजेक प्राधान्य दितात.

संबंद बरे आसल्यार अकाली मरण येवपाचो धोको ५०% उणो जाता

दुसर्‍यांचे गरजेक प्राधान्य दिवन स्वता कडेन आडनदर करप अशी वृत्ती खातीर बायलां मदीं भलायकी इबाडपाचो धोको वाडटा अशें वैज गिल्बर्ट मॅट सांगता. आपल्या भावनांक चुकीच्यो समजप आनी शरिरीक समस्यां कडेन आडनदर करचें न्हय. रागा कडेन आडनदर करचे पयलीं स्वताक कितें जाय हें विचारात. मर्यादा निश्‍चीत करात. हाका लागून नातीं घटमूट जातात. नातेसंबंद निरोगी आसल्यार मरणाचो धोको ५० टक्के उणो जाता.