भांगरभूंय | प्रतिनिधी
प्रकल्प हेर कडेन हालोवपाची मागणी
पणजी: कुमारजुंवेंचे आमदार राजेश फळदेसाय हांणी बायंगिणी खंयचेंच परिस्थितींत कोयरा प्रकल्प जावंक दिवचे नात अशें परतून एकदां स्पश्ट केलें. सरकाराक हो प्रकल्प फाटीं घेवपाक भाग पाडटले. कोयरा वेवस्थापन मंत्री बाबूश मोंसेरात हांणी ह्या कोयरा प्रकल्पा खातीर फुडल्या दोन म्हयन्यांत निविदा काडटले अशें हालींच म्हणिल्लें ताचेर प्रतिक्रिया दितना राजेश फळदेसाय उलयताले.
गोंय कोयरा वेवस्थापन म्हामंडळाचो दोन फावटीचो यत्न अयेसस्वी जाले उपरांत आतां तिसरे फावटी निविदा काडपाचे तयारेंत आसा. कितलोय विरोध जालो तरी लेगीत सरकार नियोजीत कोयरा प्रकल्प जातलोच अशें मोंसेरात हांणी म्हणिल्लें. बायंगिणी कोयरा प्रकल्प ही काळाची गरज आसून ते दिशेन सरकार पावलां उबारतां अशें लेगीत मोंसेरात हांणी म्हणिल्लें.
फळदेसाय हांणी ह्या विशयाचेर उलयतना म्हणलें, मोंसेरात हांणी ह्या प्रकल्पाचे आशिकुशीक 500 मिटर बफर झोन राखतले अशें म्हणिल्लें. प्रत्यक्षांत नगर नियोजन विभागाच्या अधिसुचोवणे प्रमाण फक्त 200 मिटर बफर झोन दाखयला. नियोजीत प्रकल्पाचे आशीकुशीक सुमार 2000 फ्लॅट्स आसात. हातूंत 6 ते 7 हजार लोक रावतात. हाचे बगर पोरणें गोंया चर्च, मठ, हॉस्पिटल, करमळीचें तळें बी ह्या प्रकल्पाचे आशिकुशीक आसात. ताका लागून तांचे व्हड प्रमाणांत लुकसाण जातलें. ते खातीर प्रकल्पा खातीर वेंचिल्ले सुवातेक विरोध कायम आसा, आनी नागरी वसणुके पसून हो प्रकल्प हेर कडेन उबारचो अशी मागणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
