भांगरभूंय | प्रतिनिधी
दुबाविताक विमानांतल्यान घेतलो ताब्यांत
कोलवें पुलीस तिगांचो घेतात सोद
मडगांव: बाणावले शेनवारा रातीं स तरणाट्यांचेर लोखंडाच्या रॉडान हल्लो केलो. गंभीर जखमी जाल्लो आलेक्सिओ बार्रेटो हॉस्पिटलांत उपचार घेता. कोलवें पुलिसांनी 4 दुबावितांचेर गुन्यांव नोंद केला. जाल्यार दुबावीत सॅम्युअल मास्कारेन्हास (21, गिरदोली) हो युकेक वचपा खातीर विमानांत बशिल्लो आसतना मोपा विमानतळा वेल्यान पुलिसांनी ताब्यांत घेवन ताका अटक केली.
मेळिल्ले म्हायती प्रमाण सॅम्युअल मास्कारेन्हास आयतारा युकेक वचपाचो आशिल्लो. ते निमतान ताणें कांय इश्टांक शेनवारा रातीं बाणावले पार्टी दिल्ली. रातच्या पावणे दोन वरांच्या सुमाराक एका हॉटेला भायर सॅम्युअल आनी ताचे इश्ट एकल्याक बडयताले. त्याच वेळार आलेक्सिओ बार्रेटो आनी ताचे इश्ट त्याच हॉटेलांत इश्टाच्या वाडदिसाची पार्टी करून भायर येताले. ह्या वेळार आलेक्सिओन सॅम्युएल हाच्या गटाक मारपेटी विशीं विचारलें. हीच तिडक धरून सॅम्युअल हाच्या गटांतल्या एकल्यान आलेक्सिओचेर लोखंडाच्या रॉडान वार केलो आनी मुठी आनी पांयांनी मारपेट केली.
आलेक्सिओ हाचे तकलेक आनी दोळ्याक गंभीर दुखापत जाल्ल्यान ताका मडगांवां खाजगी हॉस्पिटलांत उपचारा खातीर दाखल केलो. आलेक्सिओक हॉस्पिटलांत दाखल करून परतून येता आसतना खारेबांद पुला कुशीक आलेक्सिओच्या इश्टांची गाडी आडावन मुठी आनी पांयांनी तशेंच लोखंडाच्या रॉडान मारपेट केली.
हे मारपेटी वेळार आंद्रेल डिकॉस्टा, नोव्हीन काल्ड्रीया, मेबन फुर्तादो, गॉर्डन रॉड्रिग्ज हांकां मार बसलो. तशेंच गॅरी रॉड्रिग्ज हाच्या कानार रॉड मारिल्ल्यान ताच्या कानाक गंभीर दुखापत जाली. ताका हॉस्पिसिओ हॉस्पिटलांत दाखल केला. ताच्या कानाक पोंत घाल्यात. ह्या प्रकरणांत गॅरी रॉड्रिग्जान कोलवें पुलिशेंत कागाळ नोंद केल्या. पुलिसांनी सॅम्युअल मास्कारेन्हास आनी आनीक तिगां आड गुन्यांव नोंद केला.
मजगतीं, सॅम्युअल मास्कारेन्हास हो आयतारा सकाळीं युकेक वचत आशिल्ल्याची म्हायती पुलिसांक मेळ्ळी. ते प्रमाण कोलवें पुलिसांनी चौगां आड गुन्यांव नोंद केला. तशेंच मोपा विमानतळ पुलिासंची मजत घेवन विमानांत बशिल्ल्या सॅम्युअल मास्कारेन्हास हाका ताब्यांत घेवन अटक केली. जाल्यार हेर दुबावीत आकाश आटवेकार, सिध्देश व केशव हांचो सोद पुलीस घेतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
