भांगरभूंय | प्रतिनिधी
मुख्यमंत्री: मळो- पणजी 15 कोटी रुपया खर्च उबारलें पंपींग स्टेशन
पणजी : राज्यांत विवीध सुवातांचेर उदक सांठोवपा खातीर बंधारे बांदपाची गरज आसा. पूण कांय सुवातांचेर थळावे बांदांक विरोध करतात. हो विरोध आनीक खपोवन घेवचे ना अशी शिटकावणी मुख्यमंत्री डॉ. प्रमोद सावंत हांणी बुधवारा मळो- पणजी हांगा हुंवाराचें उदक सांठोवपाक खातीर सुमार 15 कोटी रुपया खर्च करून उबारिल्ल्या पंपींग स्टेशनाच्या उक्तावण सुवाळ्या वेळार केली.
ह्या वेळार मुख्यमंत्र्या सयत केंद्रीय मंत्री श्रीपाद नायक, मंत्री बाबूश मोन्सेरात, उदकास्रोत मंत्री सुभाष शिरोडकार, उदका स्रोत खात्याचे मुखेल अभियंते प्रमोद बदामी, महापौर रोहीत मोन्सेरात आनी हेर मानेस्त हाजीर आशिल्ले. मुख्यमंत्री डॉ. सावंत आनी केंद्रीय मंत्री नायक हांचे हस्तुकीं पंपींग स्टेशनाचें उक्तावण जालें.
राज्यांतलो उदकाचो प्रस्न सोडोवपा खातीर बांद बांदपाची गरज आसा. ते नदरेन सकारान यत्न केल्यात. पूण कांय वाठारांतले थळावे बांदांक विरोध करतात. कुर्टी सयत हेर चार सुवातांचेरूय बांद बांदतले. हाचे फुडें थळाव्यांचो विरोध खपोवन घेवचो ना अशें मुख्यमंत्री डॉ. सावंत हांणी फुडें सांगलें.
पणजे मळ्यांतल्या लोकांचो हुस्को मेकळो
दर वर्सा पावसाच्या दिसांनी पणजे मळ्यांत हुंवार स्थिती निर्माण जाताली. ताका लागून ह्या वाठारांतलें पावसाचें उदक सांठोवन दवरपा खातीर पंपींग स्टेशन प्रकल्प उबारला. ताचो थळाव्यांक निश्चीतूच फायदो जातलो. ह्यान फुडें ह्या वाठारांतल्या लोकांक केन्नाच हुंवाराक तोंड दिवचें पडचें ना. ताका लागून नागरिकांनी हुस्क्या मेकळें रावचें अशी हमी मुख्यमंत्र्यान दिली.
सांखळेचे वाळवंटी न्हंयेक 2013 वर्सा सावन हुंवार आयिल्ल्या सगळे उदक सांखळे घुसतालें. हुंवाराचें उदक घरांनी, दुकानांनी वचून लोकांक बरेच त्रास सोंसचे पडटाले. तशेंच तांकां लुकसाणूय जातालें. ताका लागून थंय पंपींग स्टेशन उबारलें. आतां सांखळे हुंवार येवप सासणाचो बंद जाला, अशेंय मुख्यमंत्र्यान ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
