भांगरभूंय | प्रतिनिधी
म्हापशें: पंचायत सचिवांची ऐनवेळार बदली जाल्ल्यान एकोशी हांगासरल्या मेगा बांदकाम थळाची पळोवणी पोंबुर्फा-वळावली पंचायतीन मुखार धुकल्ली. ह्या प्रकराचेर ग्रामस्थांनी तिडक उक्तायली.
पोंबुर्फा-वळावली पंचायतीन सोमारा सकाळीं 11 वरांचेर ह्या बांदकामाच्या पळोवणीची वेळ निश्चीत केल्ली. ताका लागून खूबशे ग्रामस्थ घडणूक थळार जमिल्ले. पूण पंचायत सचिवांची बदली जाल्ल्यान ही पळोवणी पंचायतीक घेवंक जमली ना. ह्या प्रकल्पा खातीर सुमार एक किमिचो रस्तो कसलीच मंजुरी घेनासतना बांदिल्ल्याचो आरोपूय ग्रामस्थांनी केल्लो.
सरपंच लिओपोल्दिना नोरोन्हा हांणी सांगलें, एकोशी हांगा ह्या प्रकल्पा खातीर बांदतल्या रस्त्याची पळोवणी पंचायतीन निश्चीत केल्ली. पूण सचिवाची बदली जाली. पंचायत सचीव नाशिल्ल्यान आमी सुवातेची पळोवणी मुखार धुकल्ली. फाटल्या 21 सप्टेंबर दिसा सुवातेचे पळोवणे खातीर ही नोटीस दिल्ली.
कांय दिसां पयलींच पंचायत सचिवाची बदली जाल्ली. पूण सचिवान मंगळार 11 मेरेन पंचायतीचो कारभार पळयतलों अशें सांगिल्लें. सदर रस्त्याच्या बेकायदोपणाची पडटाळणी करपाची. तशेंच प्रकल्प बांदकामादाराचे प्रतिनिधीय गैरहाजीर रावले आनी पंचायत सचीव नाशिल्ल्यान तपासणी मुखार धुकलिल्ल्याचें आमी तांकां कळयिल्लें. हातूंत कसलोच गुप्त हेतू नाशिल्लो. आमी नवो सचीव येवपाची आनी फुडले कारवायेची वाट पळोवं अशें सरपंचान म्हणलें.
ग्रामस्थ धिरेंद्र फडतेन म्हणलें, फाटल्या म्हयन्यांत हे सुवातीची पळोवणी केल्ली. थंयची झाडां मारून थंय हो रस्तो उबारला. 200 परस चड झाडां मारल्यांत. खरें म्हणल्यार रस्त्याच्या बांदकाम कंत्राटदाराचेर गुन्यांव दाखल जावंक जाय आशिल्लो. देवळा सयत झरे आनी बांय थंय आसा. आमच्या गांवांत कसलेच तरेचो विध्वंस आमकां नाका. आमी अशे प्रकल्प येवंक दिवचे नात. जनआंदोलन उबारलें ना जाल्यार गांवांतलो सैम नश्ट जातलो अशें तांणी म्हणलें.
हळदोणेंचे आमदार अॅड. कार्लुस फेरेरान म्हणलें, रिअल इस्टेट लॉबी हाचे फाटल्यान आसून ते गोंय काबार करूंक पळयतात. सगलेच रिअल इस्टेटकार वायट नासतात. पूण अशे तरेचे लोक जे रान वाठार सोंपयतात आनी दोंगुल्ल्यो विध्वंस करतात तेच हो उद्देग पेड्डेर करतात. ते स्वताच्या सुवार्था खातीर गोंय काबार करूंक उठल्यात. हांकां गोंयांतल्यान धांवडावन घालपाची गरज आसा अशी प्रतिक्रिया तांणी उक्तायली.
हांव म्हज्या गांवच्या लोकां फाटल्यान उबो आसा. आमी रानांतल्यान हो विकास जावंक दिवचे नात आनी जमीन परतून मेळोवन दिवं. तशेंच जांणी रान वाठार काबार केले तांचेर खटले चलोवं अशें अॅड. फेरेरा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
