भांगरभूंय | प्रतिनिधी
स कैद्यांची खंडपिठांत याचिका
म्हापशें: कोलवाळ बंदखणींत बंदखण म्हानिरिक्षकान तोंडांत पिस्तूल खुपसून दबंगगिरी दाखयत आमकां शारिरीक आनी मानसीक यातना दिल्ल्याचो आरोप करून स अंडरट्रायल कैद्यांनी उच्च न्यायालयाच्या गोंय खंडपिठांत याचिका दाखल केल्या. 30 मेच्या झगड्या उपरांत बंदखणींत आमचेर केल्ल्या छळणुकीच्या प्रकरणाची न्यायालयीन चवकशी करची अशी मागणी याचिकेंत कैद्यांनी केल्या. हे याचिके वेली सुनावणी आयज (बुधवारा) खंडपिठांत जातली.
ही याचिका कैदी समीर शेख, कुर्बान शेख, इस्मायल मुल्ला, सादीक बेल्लारी, मुस्तफा शेख आनी महमद शरीफ शेख ह्या कैद्यांनी खंडपिठांत दाखल केल्या. याचिकेंत राज्य सरकार, गृह खात्याचे सचीव, पुलीस म्हासंचालक, बंदखण म्हानिरिक्षक, ओमवीर सिंग बिश्नोई (आयपीएस) आनी बंदखण अधिक्षक हांकां प्रतिवादी केल्यात.
बंदखणींत फाटल्या 30 मे दिसा विजय कार्बोटकार आनी टारझन पार्सेकार ह्या कैद्यांच्या गँगा मदीं मारपेट जाल्ली. हे फाटभुंयेर 31 मे दिसा बंदखण म्हानिरिक्षक ओमवीर सिंग बिश्नोई हांणी पुलीस आनी आयआरबी कमांडो हांचे सयत बंदखणींत धडक दिली. कुर्बान शेख सोडून आमी याचिकादार कैद्यांक एकांतांत दवरले.
उपरांत दुसऱ्या दिसा 1 जून वेर सांजवेळा 6 वरांचेर बंदखण म्हानिरिक्षक बिश्नोई हे पुलीस आनी सुमार 30 आयआरबी कमांडो हांचे सयत बंदखणींत दाखल जाले. तांणी बंदगणींतल्या कैद्यांक भायर काडले आनी रेवाडो घालून सगल्यांक दांड्यांनी आनी खोटींनी मारपेट केली, आनी शारिरीक तशेंच मानसीक यातना दिल्यो. हो प्रकार 30 मिनटां चल्लो. हातूंत आमकां गंभीर दुखापत जाली.
कैदी सादीक बेल्लारी हाच्या तोंडांत पिस्तूल घालून आड्डल्यार शूट करपाची तशेंच बंदखणीचें गेट उक्ती करून भायर धांवून दाखोवचें अशी धमकी दिली. उपरांत आमकां अजून मेरेन वैजकी सुविधा दिनासतना सगल्यांक परतून एकांतवासांत दवरले असो आरोप हे याचिकेंत वयल्या कैद्यांनी केला.
आमकां पुलीस आनी बंदखण प्रशासना कडल्यान न्याय मेळटलो हाची शास्वती ना. ताका लागून ह्या एकंदरीत प्रकाराची न्यायालयीन चवकशीचे आदेश दिवचे आनी आमकां न्याय दिवचो अशी मागणी याचिकादार कैद्यांनी खंडपिठांत केल्या.
हे याचिकेचेर काल (मंगळारा) खंडपिठांत सुनावणी जाली आनी याचिकादार कैद्यांक तांच्या वकिलांक मेळपाक दिवपाची परवानगी बंदखण प्रशासनान दिवची असो निर्देश खंडपिठान दिवन फुडली सुनावणी आयज निश्चीत केल्या.
कैदी विकट भगतान बंदखणींत घडिल्ल्या मारपेटीचो प्रकार व्हिडियो कॉन्फरन्स सुनावणे वेळार तशेंच पत्रां वरवीं दक्षीण गोंय जिल्हो सत्र न्यायालयाचे नदरेक हाडून दिला. 31 मे दिसा आपले सयत हेर कैद्यांक बंदखण प्रशासनान आयआरबी पुलिसां वरवीं मारपेट केली. तशेंच म्हजे बरोबरूच विजय कार्बोटकार आनी सादीक बेल्लारी हाच्या तोंडांत पिस्तूल घालून एनकावंटर करपाची धमकी बंदखण म्हानिरिक्षकांनी दिवन म्हाका शारिरीक आनी मानसीक यातना दिल्ल्याचें न्यायालयाक सांगलां. हो प्रकार लेगीत वयल्या याचिकादारांनी आपले याचिकेंत नमूद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
