भांगरभूंय | प्रतिनिधी
लाखांनी रुपयांच्या कपड्यांचो लासून गोबर
फोंडें: शारांत आशिल्ल्या हॉटेल मिनीनो इमारतीच्या तळमाळ्यार आशिल्ल्या आचल ह्या कपड्याच्या दुकानाक मंगळारा सांजवेळा 5.30 वरांच्या सुमाराक उजो लागलो. उज्याचें कारण स्पश्ट जाल्लें ना, पूण उज्यांत व्हड प्रमाणांत कपडे लासून गोबर जाले.
मेळिल्ले म्हायती प्रमाण कपड्याच्या दुकानाक उजो लागिल्ल्यान फोंडें उजो पालोवपी दळाच्या जवानांक म्हायती दिली. दुकानाक लागिल्लो उजो पालोवपा खातीर जवानांनी धांव घेवन उज्याचेर नियंत्रण मेळोवपाचो यत्न केलो. पूण व्हड प्रमाणांत दुकानांत कपडे सांठोवन दवरिल्ल्यान उजो रातीं उसरां मेरेन पालोवपाचो यत्न दळाचे जवान करताले.
उज्यांत व्हड प्रमाणांत कपडे लासून गेल्ल्यान लाखांनी रुपयांचें लुकसाण जालां. उजो लागतकूच शारांत येरादारीची कोंयडी जाली. येरादारी पुलिसांनी रोखडी येरादारी तिस्क फोंडेंचे दिशेन घुंवडायली. रातीं उसरां मेरेन उजो पालोवपा खातीर उजो पालोवपी दळाचे कर्मचारी यत्न करताले. तशेंच दुकानाक उजो लागिल्ल्याचें कळटकूच नगराध्यक्ष रितेश नायक, केतन भाटीकार आनी राजेश वेरेंकार हांणी घडणूक थळार धांव घेवन पळोवणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
